Мемнан унана
Кочаже семынак гармоньым шокташ кертеш
Кодшо тылзыште В.И.Ленин лӱмеш культур полатыште моткоч ӧрыктарыше шоу — «Кок тул коклаште» — эртен. Концерт программым сӧрастараш Пошкырт кундемыште илыше Александр Речкинын йолташыже-влак Васли Ольош ден Анатолий Яваев толыныт ыле. Рвезе-влак сылне йӱкышт дене веле огыл, тӱрлӧ семӱзгарым шоктен моштымышт дене куандареныт.
Мутем умбакыже Анатолий Яваев нерген шуйынем. Тудо Мишкан районысо Озерка ял гыч. Саша Речкин дене Нижневартовскыш акаж деке унала мийымыж годым палыме лийын, да кызытат пеҥгыде кылым кучат.
Кунамрак гармоньым шокташ тӱҥалын? Могай муро-влакым йоҥгалтара? Нине да моло йодышлан вашмутым шкеж дене мутланымеке пален налына.
— Марий кундемысе сценыште икымше гана шоу годым лийынат мо?
— Марий Элыште икмыняр гана лийынам, но сценыш икымше гана лектынам. Сашан ӱжмекыже, уло кумылын толынам да нимынярат ӧкынен омыл. Шоу чынже денак сай лектын. Адакшым пошкырт вел такмак-влакым, семым залыште шинчыше-влак шокшын вашлийыныт.
— Гармоньым моткоч мастарын шоктет. Кунамрак тиде семӱзгарлан шӱмаҥынат?
— Гармоньым вич ияш годсек шоктем. Эн ончычак, мутат уке, шкенан пошкырт вел сем лектын. Кокымшо классыште тунемме годым эреак чемоданым сакен коштынам, маныт. Молан гармоньжым чемоданыш пыштенам? Таче тидым шонен воштылаш веле кодеш… Ешыштына ачамат, кочамат, ачамын шольыжат гармоньым чот шоктеныт. Нунын гаяк лияш тыршенам, витне.
— Вараракше шоктымет почеш шкеак мураш тӱҥалынат, очыни…
— Кокымшо-кумшо классыште тунемме годым Мишканысе культур пӧртын сценыштыже шоктен почеш такмак-влакым муренам.
Самолётшо куш кая?
Дальний Востокыш кая.
Школыш кошташ тӱҥалат гын,
Уло шоныш туш кая.
Мураш тӱҥалше кажне йоча тиде такмакым эн ончычак сценыште мурен, очыни. Мыйынат тыгак лийын.
— Тиддеч вара концертлашке ӱжаш тӱҥалын огытыл?
— Ӱжыныт. Муренам, гармоньым шоктенам. Залыште кидым совен вашлийме, уэш пачаш сценыш ӱжмӧ мылам, изи йочалан, моткоч келшен. Но варажым ик жаплан чарнышым. Ешаҥмекат, сценыш пешыжак ом лек. Кок ий ончыч апрельыште Саша Речкин Васли Ольош дене палымым ыштыш. Моткоч творческий шӱлышан чолга марий улыт. Мо оҥайже — Ольош дене 15-20 километр тораште илена, а мемнам Речкин палымым ыштен. Кызыт кумытын кугу йолташ улына. Вашлийына гын, кидйымалне могай семӱзгар уло — кажныж дене шоктена, перкалена. Ольош шӱвырым, ияговыжым шокта, Саша тӱмырым пералта, шиялтышым шокта, а мый гармоньым темдыштам… Репертуарыштына мурына шагал огыл… Туге йолташ лийын шуктенна, пуйто икте-весынам шӱдӧ ий палена.
— Кумытын концертым ончыкташ шонен огыдал?
— Кок ий ончыч палыме лиймеке, кеҥежым да телым Пошкырт кундемысе кажне гаяк районышто, олаште концерт дене лийынна.
— Шкендын репертаурет кугу мо?
— Утларакше такмак-влак улыт. Нуным гармонь почеш мураш йӧратем. Тыгак Озерка ялын вес талантан еҥже Влад Николаевын Владимир изажын, тыгак Васли Ольошын возымо мурыштым мурем. Репертуарым пойдараш жап кӱлеш. Йӱдвел кундемыш пашаш коштам, сандене ик тылзылан мӧҥгӧ толмеке, яра жапым пелашемлан, икшывылан ойыраш тыршем.
Алевтина Байкова мутланен.
(Фотом еш альбомжо гыч налме.)
