Марий Элыште илыше-влак «Калык участковый-2019» конкурсын регионысо этапшын сеҥышыжым ойырен налыныт.
Республикыштына тиде лӱм дене МВД-н Морко районысо отделжын пашаеҥже, полицийын майоржо Владимир Ландышев палемдалтын. Лачшымак тудын верч эн шукын йӱкленыт. Элкӧргӧ паша органлаште 2000 ий гыч тырша. Тышеч 6 ий утлаже — участковый уполномоченныйлан.
Кокымшо верыш «Шернур» межмуниципальный отделын пашаеҥже Эдуард Якимов, кумшыш Козьмодемьянск гыч участковый Андрей Трифонов лектыныт.
Профессиональный пайремышт деч ончыч Владимир Ландышев республикын чапшым Всероссийский конкурсын финалыштыже аралаш тӱҥалеш. Элын «Калык участковыйжо» лӱм верч Российын чыла регионжо гыч полиций пащаеҥ-влак таҥасаш тӱналыт.
Л.КАМАЛЕТДИНОВА
Фото: фото нар.участковый
