УВЕР ЙОГЫН

«Сеҥымашнам ончыктышаш улына»

Тиде кечылаште, 16-18 октябрьыште, Марий Эл «Лӱдыкшыдымӧ да сай качестван автомобиль корно» нацпроектым илышыш пуртымаште шумо кӱкшытшӧ дене тӱнямбал выставкыште палдара.

«Корно 2019» специализированный выставке Екатеринбургышто эрта. Тушто корно-транспорт сферыште у технический разработко-влакым ончыктат.

Тылеч ончыч, 15 октябрьыште, тиде олаштак эртыше всероссийский семинар-совещанийыште «Корно движений лӱдыкшыдымылык» федеральный проектым илышыш пуртымо дене кылдалтше йодыш-влакым каҥашеныт.

Тӱнямбал выставке лийме деч ончыч республикын правительстве пӧртыштыжӧ Марий Эл вуйлатыше Александр Евстифеев совещанийым эртарен. Тушто каласен:

— Выставкыште келшен толшын койшаш улына, мемнам национальный проектым серьезнын шуктышо семын аклышт.

«Марийскавтодор» директор Анатолий Аверинын ойлымыж почеш, выставкыште республик кок стендым ончыкта. Нунын кумдыкшо 24 квадрат метрым айла. Тушто регионын карте-схемыже да нацпроектым 2019 ийыште илышыш пуртымо тӱҥ показатель-влак, 2020 ийлан палемдыме годым ыштыме мероприятий-влак ончыкталтыныт. Тыгак национальный проект  илышыш кузе шыҥдаралтеш – тиде 6 минуташ видеороликыште каласкалалтеш.

Республикысе правительстве председательын икымше алмаштышыже Александр Сальниковын ойлымыж почеш, 2020 ийлан ыштыме контракт-влак мыняр улмо дене республик сай показательым ончыкта. Тыгак выставкыште «ушан корно» системын элементше-влакым шыҥдарыме шотышто регионысо компаний-влакын разработкышт дене палдарат.

Марий Эл вуйлатыше выставкыште республикыште корнын качествыжым контрольышто кучымо паша кузе шукталтмым ончыкташ кӱлмӧ нерген каласен. Тыгак палемден:

— Россий президентын нацпроектым илышыш пуртымо шотышто задачыжым Марий Эл тӱрыс кугыт дене: кадр йодыш, кучылтмо материал да кызытсе жаплан келшыше технике улмо шотышто — шукташ ямде. Тыгак ме Марий Эллан ойырымо окса нормативым кугемдыме нерген ойлена. Тиде мыланна моткочак кӱлешан, молан манаш гын 98 процент корно йодмашлан келшен толын огыл. Мыланна Россий президентын палемдыме нормативше марте шуаш кӱлеш, а тиде – витле деч шагал огыл процент.

Марий Эл Республикым вуйлатышын организаций да аналитике виктемжын уверже негызеш Л.КАМАЛЕТДИНОВА ямдылен

Опубликовать в Одноклассники

Добавить комментарий