Медведево районын эргыже, «Виктория» спорт школын воспитанникше, Дмитрий Чекулаев (тренерже Е.Рыбаков) кеҥеж двоеборье дене Мордовийыште верысе олимпийский резерв школын кубокшо верч таҥасымаште вийжым терген да призёр радамыш логалын.
5-6 октябрьыште Юл кундем федерал округ гыч стартыш 200 утла спортсмен лектын. Марий Эл гыч чылаже 20 наре спортсмен таҥасен. Д.Чекулаев абсолютный зачётышто кокымшо верым налын. Икымше кечын землякна 7,5 километран кроссышто эн ончылно лийын гын, сутка гыч 16 километран ече-роллер трассыште кокымшо верыш лектын.
Ӱдыр-влак коклаште эн тале вич спортсмен коклаш Ирина Соловьёва ден Анна Романова логалыныт. Кроссышто кумшо ден кокымшо верым налыныт гын, преследованийыште нылымше да визымше лийыныт. Коктынат «Виктория» спорт школын воспитанникше улыт. Ирина МРМТ-ште тунемеш, а Анна – МарГУ-што.
– Тений кеҥежым ечызе-влаклан кок гана сборым эртарыме. Усть-Кундышышто, Куярыште тренироватлалтынна, Солнечный посёлко кундемышкат лекме, – ойла ече дене тренер Е.Рыбаков. – Ӧрдыж кундемыште Дмитрий Чекулаев ден Стас Егоров ямдылалтыныт. Чекулаев олимпийский резерв училище кӱшеш кум гана Мордовийыш миен гын, Егоров – ик гана «Виктория» спорт школ кӱшеш.
Саранскыштак тыгак юниор-влак коклаште Владислав Балуев (СШОР, УОР) кокымшым, Родион Арбузов (МарГУ) визымше верым налыныт.
Палаш: 18-19 октябрьыште Йошкар-Оласе «Корта» ече базыште ече-роллер дене таҥасымаш лиеш. 19 октябрьыште уэмден чоҥымо, тул дене волгалтарыман ече-роллер трассым торжественно почыт. Уна семын Российысе ече федерацийын президентше Елена Вяльбе толшаш, вет лач тудо республикыште ече-роллер дене чапле трассым ышташ лийме, ече дене верысе федерацийын пашашкыже вашталтышым пурташ кӱлмӧ нерген ойлен.
Е.ЭШКИНИНА.
