УВЕР ЙОГЫН

Шыже, ото, марий кумалтыш…

Кызыт Марий Элыште веле огыл шыже кумалтышым эртарыме пагыт.

Мутлан, Марий юмыйӱла ушемын Йошкар-Оласе общиныже кодшо рушарнян Тумер отышко кумалаш лектын ыле.  

Пошкырт кундемыште икымше гана тӱня кумалтыш эртен. Тиде Янаул районысо Комбо ялыште  лийын. Кодшо ийысе кумалтыш годым онаеҥ-влак погынен, тудым эртараш палемденыт. Калык шуко погынен. Пошкырт кундемысе шым район, Уфа, Нефтекамск, Озаҥ, Набережные Челны гыч миеныт. Ик туломо дене индеш юмылан кумалыныт. Латик онаеҥ пелештен шоген. Каласен кодыман, Пошкырт кундемын тӱҥ онаеҥжылан Геннадий Пастиевым ойреныт. Кызыт тушто регионысо Рӱдӧ марий юмыйӱла ушемым ыштыме дене кылдалтше паша кая. Тыште Озаҥ олаште илыше да марий юмыйӱлалан мелын шогышо Виталий Головин кугу полышым пуа.     

Татарстан кундемысе Элнет ялысе Пекши Кӱсе отыштат шушаш рушарнян тыгай кумалтышым эртараш шонат. Туштыжо марий-влак, эсогыл, ХVII курым кыдал гычак тӱҥалын, кокымшо тӱнямбал сар марте кумалыныт, маныт.  

Санкт-Петербург кундемыште илыше марий-влак гын 20 октябрьыште юмылан пелешташ лектыт гын, Москошто илыше-влакын вуйым савен кумалмашышт кодшо рушарнян Ояр кӱсотышто эртен.  Тидын нерген Моско олан картше Эдуард Миннибаев увертарен.

Тыгак шыжымсе кумалтыш Курыкмарий районысо Микрак  села воктенат тений икымше гана эртен. «Еҥ шукыжак лийын огыл гынат, икымше ганалан тиде начар огыл»,- палемдыш тусо онаеҥ-арвуй Юрий Петряев. Еҥ шагал лекмылан кӧрак икымше гана кинде дене гына кумалыныт.

Палемден кодыман, тений майыште тушто, но вес отышто, тыгак икымше гана шошымсо кумалтыш лийын. Туштат марий-влак тыгак акрет годсек Юмылан пелештеныт. Тидым арвуй археолог-влак, лӱмлӧ краевед Клим Юадаров дене мутланымеке рашемден. Мо оҥайже: курыкмарий-влакын кумалме верышт православный часамла деч тораштак огыл верланен. Марий кумалтышым эртараш Ю.Петряев лӱмын Санкт-Петербург гыч толын коштеш.

С.НОСОВА.

 Снимкыште: Комбо ялысе отышто – Тӱня кумалтыш; Курыкмарий районысо кумалтыш годым.

Фотом почмо соцсетьла гыч налме.

Опубликовать в Одноклассники

Добавить комментарий