«Здравоохранений» национальный проектын «Онкологический чер дене кучедалмаш» региональный проектшым илышыш пуртымо кышкарыште Марий Элыште 2019 ийыште чумыржо 963,6 млн. теҥгем кучылташ палемдыме. Тиде окса дене регионын онкодиспансержылан да Республиканский клинический больницылан черле-шамычым эмлаш 25 единице медицине оборудованийым налаш лийме.
Октябрь тӱҥалтышлан 121 млн. теҥгеш 24 единице медицине оборудованийым налаш контрактым ыштыме. Таче кечылан республикышкына 16 единице оборудованийжым уже кондымо. Тыгодым конкурент процедурым эртарыме годым 2,3 млн. теҥгем аныклен кертме да тиде оксаш идалык мучаш марте 25 олмеш 37 единице оборудованийым налаш палемдыме.
Проект кышкарыште Республиканский онкодиспансерыш цифровой мамографым, эксперт классан, тыгак кусараш лийме УЗИ-аппарат-влакым, кӱкшӧ рашлыкан видеогастроскоп ден видеоколоноскопым, операцийым ышташлан эндовидеоскопический комплексым, шодын искусственный вентиляцийжылан тӱрлӧ режиман наркоз-шӱлымӧ аппарат ден рӱдӧ станциян да «азап» сигналым автоматически пуышо монитор-шамычым, моло оборудованийым налме.
Республиканский клинический больнице кок у ӱстембал лабораторный центрифуго, сканироватлыше микроскоп да видеоэндоскопический комплекс дене пойдаралтын.
Тылеч посна онкопатологиян черле-влаклан медицине полышым пуаш ОМС фонд гыч 838,3 млн. теҥгем ойырымо. 2019 ийын кандаш тылзе жапыштыже тиде цельлан 474 млн. утла теҥгем кучылтмо.
М.ИВАНОВА
