УВЕР ЙОГЫН

«Вашкеполыш»-влак полшаш чот вашкат?

23 сентябрьыште 23 шагатат 15 минут гутлаште Йошкар-Олаште,  Машиностроитель урем ден Сеҥымаш бульвар ушнымаште, «Вашкеполыш» машинам виктарыше 64 ияш водитель корнывожыш лекшыжла  Mazda автомобильым колтен огыл да транспорт-влак ваш миен керылтыныт.

Туткар лийме верыште «01», «02», «03» службо пашаеҥ-влакын полышышт кӱлын. Марий аварийно-утарыше службын специалистше-влаклан гын иномаркын водительжым да пассажиржым машина гыч лукташышт логалын.

ГИБДД-ын палдарымыж почеш, корно туткарыште чот эмганымылан кӧра «Вашкеполыш» машинан водительже верыштыжак колен. Вес «Вашкеполыш» бригаде тушто лийше кок пассажирым, иномаркын водительже ден пассажиржым эмлымверыш наҥгаеныт. Но Mazda автомобильыште лийше пассажир медучрежденийыште колен.

Республикысе Следственный комитетыште палемденыт: тиде туткарын кугу мутланымашым лукмыжлан кӧра делам прокуратурыш следователь-влаклан пуаш ходатайствым колтеныт.

 

Но «Вашкеполыш» машина дене пытартыш кечылаште лийше ДТП тиде веле огыл. Тылеч ончычсо кечынжат, 22 сентябрьыште, 16 шагатат 15 минутлан Семеновка селасе Советский урем ден Шернур тракт ушнымаште автомобиль-влак корным «пайлен» кертын огытыл.

«Вашкеполыш» машинам виктарыше 49 ияш пӧръеҥ корно-влак ушнымашке светофорышто йошкар тул йӱлымӧ годым канде тӱсан маячокым да сиреным чӱктен кудал эртен. Тыгодым тудо лӱдыкшыдымылыкым шотыш налын огыл. Тиде амал дене эн ончычак «ГАЗ-3302», вара «Лада Гранта» дене тӱкнен, пытартышлан отбойник манмыш миен керылтын.

Корно туткарыште «Вашкеполыш» машинаште лийше 36 да 51 ияш ӱдырамаш-влак сусыргеныт. Нуным амбулаторно эмлалташ колтеныт. 

Л.Камалетдинова

Опубликовать в Одноклассники

Добавить комментарий