26 апрель – Марий талешке кече. Тидын лӱмеш ты кечынак У Торъял поселкысо тӱвыра да каныме рӱдерыште «Торъял сем» районысо фестиваль эрта.
Тудо кумдан чапланыше марий композитор Эрик Сапаевлан пӧлеклалтеш, вет 4 мартыште тудын шочмыжлан 85 ий темын.
Фестивальыш ушнышо-влак мураш да семӱзгар дене шокташ тӱҥалыт. Кажныже кок номер гыч ончыкта. Иктыже Э.Сапаевын произведенийже лийшаш, весыже – калыкын але вес авторын. Участник-влакым жюри 4 номинаций дене аклаш тӱҥалеш: шкет мурышо, вокальный ансамбль, семӱзгар дене шкет шоктышо да инструментальный ансамбль.
Фестиваль тений кумшо гана эртаралтеш.
Л.Камалетдинова.