УВЕР ЙОГЫН

Кок ий гыч – у рӱдерым

Шушаш ийын Марий Элыште у перинатальный рӱдерым чоҥаш тӱҥалыт. Тидыже РФ Федеральный Погынымашын Федераций Советшын председательже Валентина Матвиенко ден Марий Элым вуйлатыше Александр Евстифеевын вашлиймашышт годым рашемын.

Россий парламентын кӱшыл палатыжын спикерже В.Матвиенкон мутшо почеш, чоҥаш палемдыме перинатальный рӱдер – кӱлешан социальный проект да тудым илышыш пурташлан 2020 ийын бюджетше гыч оксам ойыраш лийме. «Мыйын шонымаште, рӱдерым кок ийыште чоҥен шукташ лиеш. Конкурс ынже кӱрылт, пеҥгыде да ӱшанле компаний толжо, чоҥымо да средствам кучылтмо годым уто-сите ынже лек манын, кӱлешан чыла пашам кызытак шукташ кӱлеш», – манын В.Матвиенко.

Юл кундем федеральный округышто кызытсе жаплан келшыше перинатальный рӱдер Марий Элыште гына уке, палемден А.Евстифеев. Тудо тыгак Федераций Советын председательжым регионысо экономике дене палдарен, республиклан ойырымо тӱткышлан тауштен.

Мутланыме годым В.Матвиенко Марий Элым вуйлатышым федеральный рӱдер ден республик коклаште вияш авиаций сообщенийын пашажым уэмдыме дене саламлен.

«Те пеш чолга да пашаче губернатор улыда, а кунам калык тырша, полшымо веле шуэш. Но тидын дене чарнен шогалаш огеш кӱл. Пашан вес этапше – полосам пужен ыштымаш. Аэропорт тичмашын да кужу жап ыштыже манын, тудым уэмден шукташ кӱлеш. Тиде – чыла регион ден олалан капка. А авиасообщений уке гын, кугу инвестицийым вучыман огыл, а тӱҥжӧ – Москвашке да моло регионыш чоҥештылше-влакын комфортышт», – палемден спикер.

В.Матвиенко Марий Элым вуйлатышылан «Федераций Совет. 25 ий» шарнымашан медальым кучыктен да ончыкылык пашаште сеҥымашым тыланен.

Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен

Опубликовать в Одноклассники

Добавить комментарий