КАЛАСЕ, "МАРИЙ ЭЛ"

ДОМОФОНЫМ ОЛМЫКТЫМЫЛАН КӦ ТӰЛЫШАШ?

Подъездыштына домофон пудырген. Илыме вер оза-влакын тӱшка погынымаштышт ты оборудованийым олмыктымо шотышто йодышым тарватышым. Ятыр собственник, домофон дене чаткан пайдаланем, сандене тудым нигузеат пудыртен кертын омыл манын, оборудованийым олмыктымо услугылан тӱлаш тореш лие. Домофонын технический обслуживанийже шотышто услугым тӱлымӧ обязанность закон дене эскералтеш мо?

О.Беляев.

Йошкар-Ола.

 

РФ Гражданский кодексын 210-шо статьяж дене келшышын, закон але ойпидыш дене вес семын ончыктымо огыл гын, илыме вер оза погыжым шкеак куча.

Тылеч посна, 290-ше статья дене келшышын, шуко пачеран пӧртысӧ илыме вер оза-влакын тӱшка паян погыштлан тӱшкан пайдаланыме вер-влак, тыгак икте деч утларак пачерым обслуживатлыше механический, электрический, санитарно-технический да моло оборудований шотлалтыт. Домофон – электрический оборудований.

Палемдыман, домофонын технический обслуживанийже шотышто услугылан илыме верым социальный найм ойпидыш негыз дене айлыше-влакат тӱлышаш улыт. РФ Жилищный кодексын 154-ше статьяж дене келшышын, илыме верым кучаш да олмыкташ тӱлымӧ (плата) кышкарыш «шуко пачеран пӧртым виктарыме, шуко пачеран пӧртыштӧ тӱшка погым кучымо да олмыктымо услуго-влаклан тӱлымаш» пура.

М.ИВАНОВА

Опубликовать в Одноклассники