Иждивенийыштыже студент уло гын, пенсионер пеҥгыдемдыме пенсийжым кугемдыкташ праван. Тыште шинчымашым пуымо тӱҥ программе почеш очно тунемше йочаж нерген ойлалтеш. Тыгодым тудо 23 деч кугу ийготан лийшаш огыл. Икшывын 18 ийым темымешкыже, кугыжаныш пенсионер ача-аважлан пеҥгыдемдыме деч кугурак пенсийым тӱла, тыгодым йочан тунеммыжым шотыш огеш нал.
Кугемдыме выплате шоҥгылык але инвалидность шотышто страховой пенсийыш палемдалтеш. Тыгодым ешысе пашам ыштен кертдыме кумыт деч шагал огыл еҥ гына шотыш налалтеш.
2019 ий 1 январь гыч пеҥгыдемдыме выплатын кугытшо тылзыште 5334 теҥгеат 19 ыр лийын. Ешысе иждивенец-влакын чотыштым шотыш налаш гын, тиде выплате ик тунемше дене 7112 теҥгеат 25 ырыш шуэш, кокыт дене – 8890 теҥгеат 31 ырыш, кумыт да тылеч шукырак дене – 10668 теҥгеат 37 ырыш.
Кугемдыме выплатым палемдашлан студентан пенсионер ача-ава-шамычлан Россий Пенсий фондын верысе органышкыже йодмаш дене мийыман, пелен икшывын шочмо нерген кагазшым, иждивенийым пеҥгыдемдыше документым, тунемме заведений гыч справкым налман.
Студентын тунеммым чарнымыже але тунемме вес формыш куснымыж годым пенсионер ача-ава-влак тыгай правам йомдарат.
М.ИВАНОВА
