Физкульт, ура!
Чылажат тазалыкым шуараш ышталтеш
Физкультур ден спортлан кумылан, тудын верч чон дене йўлышӧ туныктышым парня дене шотлаш лиеш. Нунын коклаште иктыже – Волжский районысо Памар кыдалаш школышто тыршыше Э.Кудрявцев. Ончыч тудо Карай школышто пашам ыштен. Ятыр ий ече дене тренер сомылым шуктен. Эрик Васильевич воспитанникше-влакым таза илыш-йўлалан, спортлан кумылаҥден мошта. Нунат туныктышыштым йӧратат.
Шукерте огыл Памар школышто спортзалым ончалаш, физкультур урокышто лияшат йӧн лекте. Мотор шошо игече. Перерыв жапыште ўдыр-рвезе-влак школ ончылно лум чумыркам ыштен кышкылтыт. «Тура лўйылташ тунемыда?» манмылан «туге шол» манын, лум чумыркам кучен, рвезе-влак ўдыр-шамычым поктыл куржыч.
Урок тўҥалшашым шижтарен, йыҥгыр йоҥгалтмек, спортзалыш ончалаш лийым. Тыште йоча-влак упражненийым ыштат ыле. «Урокын шкешотан разминкыже», – шоналтышым семынем.
– Мемнан пашаште эн тўҥ – йоча-влакын тазалыкыштым шуараш, – ойла физкультурым туныктышо. – ™дыр-рвезе-влак таза лийыт гын, сайын тунемыт, шонышыжо кугу спортышкат корным виктара. Адакшым военный службым эрташыштат куштылгырак. Школышто физкультур урокым арняште кум гана эртарымым сайлан гына шотлем. Йоча-влаклан шукырак тарванылаш йӧн пуалтеш. ГТО-м илышыш шыҥдарымат пайдале. Но таче кагаз паша чоныш витара. Мыйын шонымаште, физкультурым туныктышо тидлан шуко жапым йомдарышаш огыл.
Кумло ий ты сферыште тыршыше Эрик Васильевич ОБЖ урокымат эртара. Военно-патриотический воспитанийланат негызым школышто пыштат.
Тунемше-влак районышто эртаралтше чыла таҥасымаште вийыштым тергат. Сайрак результат дене республик кўкшытыш лектыт. Мутлан, шукерте огыл эртаралтше ГТО фестивальыш миеныт.
Паша ышталтеш, физкультур урок шке расписанийже дене эрта, но тыгодым тўрлӧ йодышат лектеш…
Э.Кудрявцев:
«Проблемыже инвентарь дене кылдалтын. Ечым ача-ава-влак шкеак налыт. Тиде вид дене заниматлыше-шамычлан шагал огыл шийвундым луктын пыштыман. Ик комплектше 20-30 тўжемышкат шуэш. Тылеч посна вургемымат налаш кўлеш, таҥасымашкат лекман. Моло инвентарь шотыштат моктанаш ок лий. Волейбол, баскетбол мече кўрышталт пытеныт. Уэмдыман, весе дене вашталтыман, но тидлан йӧн уке. Мо улыж дене пайдаланена. Лишыл жапыште призывник-шамыч коклаште спартакиаде эртышаш. Тудланат ямдылалтына. Тушко икмыняр вид пура. Нунын коклаште иймашат уло. Теве тидыже мемнан дене окшакла».
Е.Эшкинина.
