10 сентябрьыште Россий Федерацийын Федераций Советшын пресс-конференцийыштыже «Ужар патруль» общероссийский мер организаций ден «Национальный экологический корпус» ушем 2019 ийысе кеҥежым иктешлыме негызеш ямдылыме «Россий Федераций регион-влакын национальный экологический рейтингышт» дене палдареныт.
«Ужар патруль» организацийын председательже Андрей Нагибинын мутшо почеш, рейтингым 21 индикаторым шотыш налын ыштыме. Пытартыш 85-ше верыш икымше гана Иркутск область логалын. Тиде регионышто эртыше кеҥежым вӱд кок гана ташлыш, тылеч посна моткоч кугу кумдык чодыра йӱлыш. Пытартыш лу верыш тыгак Свердловск, Челябинск, Нижегородск, Оренбург, Омск, Москва областьла, Саха Республик да Красноярск ден Забайкальск край-влак логалыныт.
Икымше лу верыште Тамбов, Белгород, Магадан, Курск, Мурманск, Ульяновск область, Алтай ден Коми республик-влак , Алтай край да Москва ола улыт. Москва – визымше верыште.
Марий Элна – 28-ше верыште. 2018 ий дене таҥастарымаште тудо ныл корнылан кӱзен. Пошкудо Чуваш Республик – 14-ше верыште (ик корнылан кӱзен), Татарстан Республик – 39-ше верыште (ик корнылан волен), Киров область – 48-ше верыште (кум корнылан волен).
М.ИВАНОВА
