Кеҥежым кажныже чон вургыж вуча. Иктышт шочмо ялышкышт пӧртылын, турлӧ пашам шуктат, а весышт шокшо элыште канат. Марий артист, мурызо-влак отпускым кушто эртареныт, тиде жапыште мом ыштеныт?
Александр Кожевников, Марий самырык театрын артистше, Олык Ипай лӱмеш Кугыжаныш премийын лауреатше:
— Сочи воктенысе Лазаревское посёлкышто пелашем дене каненна. Ик кечылан Абхазийышкат миен толынна. Тусо пӱртӱс пеш мотор, южшат вестӱрлӧ. Шем теҥызыште колым кучаш пароход дене лектынна. Ставрида кол логалын! А мӧҥгӧ пӧртылмеке, пелашемын шочмо верышкыже, Татарстан Агрыз район Кӧлегеш ялышкыжат, миен толынна. Тушто монча пурам нӧлтышна.
Светлана Яндукова, Олык Ипай лӱмеш Кугыжаныш премийын лауреатше, мурызо:
— Тора кундемыш монь кудалышташ жап лийын огыл. Отпуск жапыште шочмо пӧртыштем авам дене пырля лийынам. Туштат паша ситыше. Тений теве эҥыжшак мочол шочын!
А.БАЙКОВА
