Кодшо арнян кугыжаныш комиссий РФ Президент В.Путинын темлымыж почеш илышыш пуртымо да Марий Элым вуйлатыше А.Евстифеевын эскерымыж почеш шуктымо «Лӱдыкшыдымӧ да сай качестван автомобиль корно» национальный проект кышкарыште олмыктымо «Звенигово – Шолэҥер – Морко» корным почын.
Олмыктымо 21+800 – 26+700 км ужаш Звенигово ден Морко район-влакым авалта да нуным Шолэҥер посёлко, тыгак Озаҥ тракт дене уша. Кужытшо 4,1 километрыш шуын, кумдыкшо – 28 886 квадрат метрыш. Негызшым йӱштӧ регенераций йӧн дене ыштыме. Участкыш кок лончо асфальт-бетон вартышым пыштыме. Пашан акше 52,9 млн. теҥгеш шуын.
«Контрактыште ончыктымо чыла пашам тичмашын шуктымо. Асфальт-бетон шартыш кужу жаплан ситышаш, молан манаш гын негызым, цемент ден эмульсийым кучылтын, йӱштӧ регенераций йӧн дене ыштыме», – палемден объектым ончышо тӱҥ инженер С.Соловьев.
«Марийскавтодор» ГКУ-н автомобиль корным олмыктымо да вияҥдыме пӧлкажын вӱдышӧ специалистше Р.Шигаповын мутшо почеш, подрядчик паша жапыште чыла замечанийым шотыш налын да жапыштыже тӧрлен. Кучылтмо чыла материалым лабораторийыште тергыме да сертификат дене пеҥгыдемдыме.
М.ИВАНОВА
