Шарнымаш корно дене
Георгиевский сортам – Берлиныш
Сеҥымаш пайрем кечын Берлиныште Марий Эл гыч намийыме Георгиевский сортам чўктат.
Апрель мучаште байкер-влакын «Ночные волки» российский клубын участникыше-влак Берлиныш тарванат. Нуно пеленышт Йошкар-Олаште ыштыме Георгиевский сортам налыт. Тиде акцийлан тўҥалтышым Дмитрий Мишин ыштен.
– Тыгай сортам Йошкар-Оласе школлаште тунемше-влак ыштеныт, шке кидышт дене лўмыштымат возеныт. Мутлан, тушто эше тыгай ойсавыртышат уло: «Спасибо деду за победу», «Ме шарнена, ме кугешнена»… Ме шке геройна-влакым, нунын пашаштым шарнышаш улына, самырык тукымлан патриотический шўлышым изинекак пуртыман. 9 майыште Марий Эл гыч Воин чап монумент сўретан ик сортам Берлиныште чўктат гын, весым – Йошкар-Олаште. Байкер-влак республик гыч пеленышт чылаже 90 сортам наҥгаят. «Сеҥымаш корно дене» движенийыш тўрлє кундем гыч мотоциклист-шамыч ушнат, – мане пресс-конференцийыште Д.Мишин.
Марий Эл гыч Берлин марте сортам наҥгаяш «Ночные волки» клубын эн кугу ийготан участникше Сергей Малковлан ўшаненыт.
– Кўлешан пашам тўҥалме. Самырык тукымлан кеч изи пашана дене эртыше историйым шарныктена гын, ача-кочанан подвигыштым палаш тўҥалыт, – пеҥгыдемден мане С.Малков.
Е.Эшкинина.
Снимкыште: «Ночные волки» клубын участникше-влак: А.Кабанов, С.Малков, В.Яранов, Д.Мишин тунемше-влак дене пырля.