Йошкар-Оласе Благовещений башньыште Параньга районлан пӧлеклалтше
ончер почылтын.
Тудо «Марий Эл Республикын политкультурный картше» проектын кышкарыштыже эрта. Проектше Марий Элын 100 ияш лӱмгечыжлан пӧлеклалтеш да республикын «2013-2025 ийлалан Марий Эл Республикын кугыжаныш национальный политикыже» кугыжаныш программыж дене келшышын эртаралтеш. Тӱҥ шонымашыже: республикысе район-влакын историйышт дене кылдалтше поянлыкым ончыкташ. Тиде амал денак Благовещений башньыште кажне муниципальный образованийлан пӧлеклалтше тыгай ончер-влак эртат.
Тымарте ме нунын гоч Козьмодемьянск ола, Курыкмарий, Морко, Звенигово, Волжск район-влакын историйышт да тӱвырашт дене палыме лийынна. Ынде Параньга кундемлан черет шуын. Мо дене районысо калык таче ила, мо дене кугешнен кертеш — чылажат экспозицийыште ужаш лиеш. Икманаш, ончер Параньга велне илыше калык-влакын этнографийышт дене палдара. Поснак кидпаша мастар-шамычын ыштыш-кучышыштым палемден кодыман. А тушто тӱрызат, пидшат, ургышат, апшатат, шун гыч ненчышат, кӱртньым моторын таптышат да моло кидмастарат ситышын. Тыгак тусо сӱретче-влак Александр Усоловын, Тахир Каримовын пашаштымат ужаш лиеш.
Ончерым почмашке республикын тӱвыра, печать да калык-влакын пашашт шотышто министр Константин Иванов, Параньга муниципальный образованийын администрацийжым вуйлатыше Альфит Ибраев, тусо администрацийыште тӱвыра, физкультур да спорт пашалан вуйын шогышо пӧлкан пашажым виктарыше Наиля Гараева лийыныт.
Каласен кодыман, тачысе кечылан Параньга районышто шуко татар ила. Санденак тӱвыра аланыште тидат шижалтеш. Руш, марий калык дене кылдалтше мероприятий-влак дене пырля татар национальный пайрем-влакат эртаралтыт. Мутлан, «Сабантуй», «Комбо пайрем», «Курбан байрам», «Навруз» да молат. Татар калыкын национальный ойыртемже калык промыселыштат шижалтеш. Но нине кум тӱрлӧ калык гыч лекше еҥ-влак ожнысек, келшен, шке илышыштым ворандарат, тӱварышатым вияҥдат.
Ончерым почмашке Параньга район гыч руш, марий да татар творческий коллектив-влак толыныт ыле, кажныжын семже йоҥген. Ончерым почмо годым Константин Ивановат тӱрлӧ калык илыман ик кумдыкышто кажныжын национальный ойыртемжым арален кодаш кӱлмӧ нерген эше ик гана палемден. Район вуйлатышат шке кундем да калык дене палдарыше тыгай ончерым эртараш йӧным пуымылан тауштен.
С.НОСОВА
Снимкылаште: ончерым почмо годым.
М.Скобелевын фотожо.
