5-8 сентябрьыште Саратовышто имне спорт дене эртыше всероссийский таҥасымаш гыч Марий Элын участникше-шамыч 12 медаль дене пӧртылыныт.
Ийготым шотыш налын, ӱдыр-рвезе-влак тӱрлӧ дистанцийыште да тӱрлӧ кӱкшытым налмаште кум кече таҥасеныт. Тыге мемнан-шамыч куд шӧртньӧ, ныл ший, кок бронзо медальым сеҥен налыныт. Икымше верыш Арабика имньыж дене Анна Сараева кок гана, кокымшо верыш Арабика имне денак Дарья Чернова кок гана, вес маршрутышто икымше верыш Ютика имне дене Дарья Егошина, Бьюти имньыж дене Юлия Голубева икымше, кокымшо, кумшо верыш лектыныт.
Вич ияш Шанталь лӱман имне дене Катрина Данилевская кок гана сеҥыше радамыш лектын да эше ик маршрутышто кокымшо верым налын. Таҥасымашын тӱҥ призшат, гран-при, Катриналан логалын.
Тыгай кӱкшытан таҥасымаште мемнан команде икымше гана выступатлен.
Е.ЭШКИНИНА.
