7 сентябрьыште Йошкар-Оласе «Дзюдо» спортзалыште Марий Элын первенствыштыже Волжск ола, Йошкар-Ола, Курыкмарий, Морко, Медведево районла гыч ятыр ӱдыр-рвезе вийжым терген.
– Тиде турнирыште Морко кундем гыч Николай Мурзаев, Алексей Викторов, Линар Измайлов, Дмитрий Тимофеев, Дмитрий Никитин, Кирилл Данилов, Анна Воронова таҥасеныт. Кирилл ден Анна шке тӱшкаштышт кокымшым, Алексей Викторов икымше верым налыныт, – ойлыш Ю.Степанов. – Пеҥгыде койыш-шоктыш дене ойыртемалтыт. Икмынярышт ик гана веле огыл тыгай кўкшытан турнирыште таҥасат.
Марий Элын сулло тренерже, Марий Эл образованийын сулло пашаеҥже, РФ-н отличникше Юрий Борисович 35 ий ӱдыр-рвезе-шамычым дзюдолан кумылаҥда. Воспитанникше-влак кокла гыч 14 еҥ Российын спорт мастерже нормативым шуктен. Жапше годым тудо шкежат тале спортсмен семын аклалтын, тӱрлӧ олалаште эртаралтше турнирлаште Марий Элын чапшым арален. Воспитанникше-влаклан – сай пример.
Ончыч пӧръеҥ-влак веле спортын кучедалме видлаштыже вийыштым тергеныт гын, пытартыш жапыште ӱдыр-шамычат кумылын ушнат, сай результатым ончыктат. Мутлан, Морко посёлкысо 1-ше №-ан школышто тунемше Анна Воронова. Тудым дзюдолан пырля тунемме йолташыже сымыстарен.
– Такшым мый чыла шотыштат чолга улам. Военныйыш тунемаш каяш шонем, сандене дзюдо секцийыш коштам. Мемнам Юрий Борисович Степанов тренироватла. Район, республик кўкшытаныште таҥасем. Икмыняр гана призёр радамыш логалынам. Тыгак скрипка, фортепиано дене шоктем, хорышто мурем. Ты кружокыш лу ий коштам. Тидыже шкем чыла велымат вияҥдыме семын пайдале. Ик вид весыжлан ок мешае, тунеммашат єрдыжеш ок код. Шонет гын, чылажымат шукташ лиеш. Таче икымше верыш лекташ вий-куат, чытыш ситен огытыл, – ойла Анна. – УОР гыч соперникем талырак лие.
Тиде турнирыште олимпийский резерв училище (УОР) гыч спортсмен-влак эн шуко медальым (вич шєртньє, кум ший, ик бронзо) сеҥен налыныт. Команде-влак коклаште кокымшо верыш (ныл шєртньє медаль) Козьмодемьянск гыч толшо дзюдоист-шамыч лектыныт. Ик шєртньє медаль дене республикысе СШОР ден Морко район гыч команде-влак палемдалтыныт.
Дзюдо дене 18 ияш марте Марий Элын первенствыштыже шке нелытанышт-влак коклаште Андрей Соколов (СШОР, 46 кг), Алексей Викторов (Морко, 50 кг), Влад Свистунов (УОР, 55 кг), Даниил Камаев (УОР, 60 кг), Илья Мурыгин (Козьмодемьянск, 66 кг), Максим Трубицын (УОР, 73 кг), Андрей Колонцов (УОР, 18 кг), Максим Рыбников (Козьмодемьянск, 90 кг), ўдыр-влак коклаште Валерия Художникова (УОР, 48 кг), Евгения Мисаева (Козьмодемьянск, 52 кг), Ксения Тамянова (Козьмодемьянск, 57 кг) икымше верым сеҥен налыныт.
Е.Эшкинина.
Авторын фотожо.
