10 сентябрьыште Оренбургысо президент кадет училищыште «Зарница Поволжья-2019» VII военно-спортивный модмаш почылтын. Тушто Марий Элын чапшым Волжский районысо Шарача кыдалаш школын 14 тунемшыже аралаш тӱҥалеш.
Финал таҥасымаш «Самородово» тазаҥдыме лагерьыште эрта. Тушто Юл кундем федерал округ гыч 14 команде, 200 юнармеец вийжым терга. Нуно чыланат регионал этаплаште сеҥышыш лекше улыт.
Уна-влакым Россий президентын ПФО-што полномочный представительже Игорь Комаровын лўмжє дене Оренбург областьын федерал инспекторжо Ринат Гильмутдинов саламлен. Тудо «Зарницы Поволжья» военно-спортивный модмашым ПФО-што ик эн кумда патриотический проект манын палемден. Ты проект шӱдӧ дене самырык еҥым уша.
– Финал Шарнымаш да чап идалык деч ончыч эртаралтеш. Таче тышке Юл кундем регионласе эн сай команде-влак чумыргеныт. Кугу Отечественный сарыште сеҥыше-шамычын уныкаштын икшывыштым ужына. Самырык-влакынат шўмыштышт патриотизм шӱлыш озалана. У тукым весым алмашта. Тыге ме шочмо элым йӧраташ, историйым чын умылаш туныктышаш улына. Те арня мучко военно-спортивный модмаште, творческий конкурслаште вийым тергаш тӱҥалыда. Кугу да поян программе кажне командылан чыла велым почылташ, у йолташым муаш йєным пуа, – манын Р.Гильмутдинов.
Таҥасымашым торжественно почмаш деч вара участник-шамыч «Салют, Победа!» историко-мемориальный комплексыште лийыныт. Тушто нунылан оҥай экскурсий эртаралтын. Варажым таҥасымашлаште вийыштым тергеныт. Команде-влак гранатым кышкеныт, куржталыныт, чаракан полосам эртеныт, автоматым рончен погеныт, лўйылтыныт…
Ончыкыжым нуным военно-исторический викторине-влак, герой-шамыч дене вашлиймаш, «Страницы истории», «Наши победы», «Дорогами бессмертного полка» темылан келыштаралтше кече-влак вучат.
Е.ЭШКИНИНА.
