СПОРТ

Игечыжат сай, корныжат чапле

7 сентябрьыште Йошкар-Оласе «Арена» манеж воктене ече-роллер дене Марий Элын первенствыже лийын. Тушко регионнан тӱрлӧ кундемже гыч толшо ӱдыр-рвезе-влак деч посна пошкудо Татарстан, Чуваш республикла, Киров область гычат спортсмен-шамыч толыныт.

Шӧртньӧ шыже. Игечыжат молгунамсе деч шокшо. Кечывал тура. «Арена» манеж. Тудын йырым-йырже ӱдыр-рвезе-влак, ечытоя дене шӱкалын, ече-роллер дене кудалын пӧрдыт. Тыге участник-шамыч разминкым ыштат. Таче нуно команде дене таҥасаш ямдылалтыт. Коеш: спортсмен, тыгак тренер-шамычат тургыжланат. Ӱдыр-рвезе-влак кузе палемдыме корным писын куржын эрташ манын шонат гын, тренер-шамыч – воспитанникыштын сай результатышт верч. Нуно эше ик гана инвентарьым тергат,  шотыш кондаш полшат.

Уто кырча-марчам кораҥдышт, корным ямдылышт. Теве икымше этаплан старт пуалте. Участник-влак палемдыме корныш чымалтыч. Ече-роллер дене лӱдыкшырак… Поснак йырым савырнымаште. Лач ты верыштак южышт камвозыч, ӧрдыжкырак каен колтышт, а тидыже результатлан чаракым ышта. Кокымшо этап… Ик тӱшка почеш весе стартым нале. Ӱдыр-влакын лўдынракын, эскералтынрак таҥасымышт шижалтеш.

– Тидыже чынак, – манеш Кужэҥер район гыч тренер В.Еменгулов.– Рвезе-влакын лӱддымылыкышт коеш, пеҥгыдырак улыт. Адакшым нуно армийлан ямдылалтыт. Ӱдыр-шамыч камвочмо деч лӱдыт. Асфальтыште кид-йол чот сусырга. Тыгай корным пушкыдо лум дене таҥастараш ок лий. Адакшым ече-роллер дене техникыжат весе, нелырак. Тояжымат чын шынден моштыман, йолжымат жапыштыже сайын налын савыралман. Ече дене мунчалтен куржмо гай огыл. Таҥасымаш моткоч «шокшын» эрта. Талырак-влак икте-весыштым эртен чымалтыт. Тыге ончен шоген кычкырымеке, Россий кӱкшытыштє улмыла веле чучеш. Поснак республикын сборный командыштыже улшо-влак тыршат. Морко гыч Тигран Аратюнян (ончычсо тренерже Александр Романов) ден Советский район гыч Алексей Сапаров (тренерже Сергей Кугергин) талылан шотлалтыт. Шкештат тыршат, пытартыш жапыште спортсмен-влаклан йӧнымат ыштат, тугеже результат лиеш. Рвезе-шамыч шке тыршат гын, сеҥымашкат шуыт. Мутлан, ӱмаште Александр Рыбаков 14-15-ше верым налеш ыле гын, тений призёр радамыш лектеш.

– Йӧн шотышто ешарыме шуэш. Кызыт «Кортышто» тул дене волгалтарыман ече-роллер трассым ыштат. Кодшо арнян пашазе-влак олмыкташ тӱҥалыныт, – ойла «Виктория» спорт школын вуйлатышыже А.Захаров. – Лишыл жапыште Волжск олаште курыкан, сай рельефан верыште ече-роллер трассым ямдылен шуктышаш улыт. Кызыт Правительстват, Молодёжный политике, спорт, туризм министерстват полшат, кугу тӱткышым ойырат, сєрымыштым шуктат. Мутлан, ече дене мунчалташ кастене тул дене волгалтарыман корным ышташ сӧреныт, да тений ыштеныт. Уке гын ончыч таче ойлат да лу ийлан мондат ыле. Проект почеш кӱлешан оборудованийымат налме. Ынде эн тӱҥжӧ –  йоча-влакым кумылаҥдаш. Нуно чон йӱлен ямдылалташ тӱҥалыт гын, результат лийшаш. Мемнан «Виктория» школ спортын ныл видшым уша: биатлоным, пулевой лўйылтмашым, спорт туризмым, но эн тӱҥжылан, негызлан садак ече шотлалтеш. Тудо олимпийский вид, сандене вияҥден колтыман.

Тренер-влакын умылтарымышт жапыште, ийготым шотыш налын, икмыняр тӱшка финишыш толын шуо.

Сеҥыше-влак кокла гыч иктыже – Алексей Сапаров.

– Таче таҥасымаш сайын эртен. Чылажат, тренировкат, сборжат ситышын лийыныт, – кӱчыкын да раш вашештыш  Алексей.

– Мыланем эмлалтме деч вара изиш вий-куат ыш сите, векат, сандене кокымшо вер шӱлештын-шўлештын, шыргыжалын мане Волжский районысо Упшер гыч Алина Зайкова. – Ече спортлан авам кумылаҥден (авт. ече дене спорт мастер, кызыт физкультур предметым туныктышо Тамара Зайкова). А роллер дене изиш лўдыкшырак, но тунемына. Ече-роллер дене лишыл вес таҥасымаш Чуваш Республикыште лиеш. Тушто вием тергаш тӱҥалам.

Таҥасымаш веселан мучашлалте. Ача-ава-влакат икшывыштым кумылаҥдаш толыныт. Икманаш, спорт пайремыште чыланат пайдалын каненыт манаш келшен толеш.

Тўшкам шотыш налын, Полина Петрова (Звенигово район) ден Карина Егорова (Волжский район), Кирилл Самойлов ден Данил Сенюшкин (Курыкмарий район), Софья Протасова ден Екатерина Чернышева (Волжск ола), Александр Петров ден Вадим Скворцов (Звенигово район), Полина Стрелец ден Юлия Морозова (Волжск ола), Александр Шабалин (Медведево район) ден Алексей Сапаров (Советский район), Елена Якимова (Звенигово район) ден Наталья Морозова (Волжск ола), Александр Михайлов ден Сергей Патрушев (Чебоксар ола) икымше верыш лектыныт.

Тыге ечызе-спортсмен-влак телылан ямдылалтыт.

 

Е.ЭШКИНИНА.

Снимкылаште: старт пуалтын; А.Захаров, В.Еменгулов, А.Зайкова, А.Сапаров.

Авторын фотожо.

Опубликовать в Одноклассники

Добавить комментарий