Тыгай кӱштымашым Козьмодемьянск олаште эртыше правительствын заседанийыштыже Марий Элым вуйлатыше Александр Евстифеев пӱртӱс поянлык, экологий да йырым-йырысе средам аралыме министр Алексей Киселевлан пуэн.
«Кок арня ончыч Морко район мучко коштын савырнышым. Нуно пич каят, молан манаш гын тушто – улыжат кок машина: иктыжым кечывал марте олмыктат, весыжым – кечывал деч вара. Лишыл жапыште Морко районышто кеч ик машинам уэмдаш кӱлеш. Тиде йодышым оператор дене кузе ончымыда шотышто тендан деч докладым вучем», – кӱштен А.Евстифеев.
Кӱштымаш шукталтеш, да Морко районыш 1 октябрь марте 200 у пластик евроконтейнер ден 2 мусоровозым наҥгаена, вашештен А.Киселев.
Ушештарена, правительствын заседанийыштыже ончымо йодыш-влак кокла гыч иктыже «Благоустройство» региональный операторын 2020 ий 1 январь гыч авалташ палемдыме кокымшо зоныж дене кылдалтын.
Кызыт Курыкмарий районын 20 тӱжем утла еҥым авалтыше илыме 5 процент кумдыкыштыжо шӱкшакым централизованно погат. Тыште 248 контейнерым шындыме, ты шотыштак 21 йоҥгытшо торым посна погаш палемдалтын. Районышто 6 мусоровоз пашам ышта.
Марий Элын Пӱртӱс поянлык, экологий да йырым-йырысе средам аралыме министерствыж ден «Благоустройство» региональный оператор республикнан кокымшо зоныж гыч пеҥгыде коммунал шӱкшакым лукташлан пашам ыштыме икымше ийын 3 машинам, 500 контейнерым (ты чот гыч 250 йоҥгытшым районлаште вераҥдаш палемдыме, моло пелыжым – Козьмодемьянск олаште) налме шотышто йодышым каҥашат.
Марий Элым вуйлатышын организаций да аналитике виктемжын уверже негызеш М.ИВАНОВА ямдылен
