ЯЛ ИЛЫШ

Пӱртӱс «пӧлекым» ямдылен

Республикысе колхоз ден озанлыклаште шошо агалан изин-кугун ямдылалтыт: пасуш лекташ техникым ачалат, погат, шотыш кондат, ӱяҥдышым налыт, моло пашам шуктат.

Вӱргечын, 19 апрельыште, Параньга районысо «Победа» СХПК-ште лиймына годымат агроном Иван Кондратьев шошо агалан тӱрыс гаяк ямде улмышт нерген каласкалыш. Ты кечын игече йӱштырак ыле гынат, кече жапын-жапынже шыратенак ончыш. Сандене шошын «шонен-шоненрак» гынат, садак озаланымыже шижалтын.   

— Ӱдаш пырчым ямдылыме, но уремыште юалгырак игече шогымылан кӧра травитлаш эше эр. Ӱяҥдышым налме. Трактор, вес технике пасуш лекташ ямде. Кызыт пашаеҥ-влак тырмам, налме у техникым погат, — палдарыш самырык специалист.

Ойлымыж почеш, ӱмаште пасушко 24 апрельыште лектыныт улмаш.

— Кызыт леве игече шога гын, арня гыч подкормкыш лекташ лиеш ыле дыр. Но йӱкшемдымылан кӧра тений пасу пашам тылеч варашрак тӱҥалаш логалеш. Сай игече толмым вучаш перна, — мане агроном. 

Но эрлашыжым уремыште мо ышталте?! Пӱртӱс сай «пӧлекым» ыштыш: изарнян угыч теле тольо. Синоптик-влак тиде кечын ик тылзаш нормо лум возеш манын, икмыняр кече ончычак ойленыт ыле гынат, тидлан  иктат ӱшанен огыл. А теве эрлан тунар лумын – эсогыл лум пургыж-влак лийын шинчыныт. Пашашке толмо годым ошкылаш неле ыле – туге корно петырнен да поран ӱштын.

Игече локтылалтмылан кӧра машинам, микроавтобус ден троллейбусым виктарыше-шамычат нелылыкыш логалыныт. Адакшым шукынжо теле ораваштым кеҥежымсылан вашталтен шуктеныт. Чыла нине амал дене ты кечын шагал огыл аварий лийын.

Синоптик-влакын палдарымышт почеш, тыгай игече арня мучаш марте «куандара».  Изарнян да кугарнян ночко лум луммо деч вара корно ияҥын кертеш. Йӱдым южын температурыжо 0 гыч -5 градус марте, кечывалым 0 гыч -2 градус марте лиеш. Вес арнян игече левештышаш манын сӧрат. Тугеже ӱшанен вучаш тӱҥалына.

Любовь Камалетдинова.

Снимкыште: Ю.Тупицын ден Е.Паймаков ӱдаш лекташ у сеялкым погат.

М.Скобелевын фотожо.

Опубликовать в Одноклассники