Кодшо каныш кечылаште Сеҥымашын ХХХ идалыкше лӱмеш тӱвыра полатыште пеледыш ончер эртен.
Тений тудо марий рӱдолан 435 ияш лӱмгечыжлан пӧлеклалтын ыле. Тӱвыра полатын икымше пачашышкыже пурен, пеледыш тӱняш логалмыла чучын. Йӧратат олаште илыше-влак шке садыштышт тӱрлӧ пеледышым ончен кушташ. Посна еҥ, организаций, школ ден йочасад-шамычат ончерлан шке эскпозицийыштым ямдыленыт. Сӱрет, панно, аршаш семын сылнештарымат лийыныт. Молгунамсе семынак Юл кундем кугыжаныш технологий университетын Ботанический садшын эспозицийже ик эн кугу да поян лийын. Тудак икымше степенян диплом да пӧлек сертификат дене палемдалтын.
Озаҥ гыч толшо предприниматель Айгуль Гайнуллинан мотор деч мотор роза, пеларгоний ден гортензий-влакым конден ыле. Кокымшо степенян дипломым сеҥен налын. А Сеҥымашын ХХХ идалыкше лӱмеш полатын пашаеҥже Надежда Османован пеледыш аршашыжлан кумшо верым пуэныт.
Посна еҥ-влакын композицийыштымат тӱрлӧ степенян диплом, пӧлек сертификат дене палемденыт. Нунын коклаште сад-пакчаште веле огыл, окнаште тӱрлӧ пеледышым ончен куштышат лийыныт. Эшежым южо еҥже шке экспозицийжым пеш моторын лӱмден. Мутлан, «Йошкар-Олан тулжо», «Эн йӧратыме оламлан»…
Школ ден йочасад-влак кажне гана пеледыш конкурсыш чолган ушнат. Тений А.С.Пушкин лӱмеш 4-ше №-ан гимназий ден 34-ше №-ан йочасад икымше степенян диплом дене палемдалтыныт.
С.НОСОВА
Снимкыште: пеледыш ончер годым.
