УВЕР ЙОГЫН

Вашталтыш уло

 Кугыжанышын шулдыр йымалныже улшо республикысе пӱртӱс кумдыклаште илыш икшырымын кая гынат,  вашталтыш-влак лиедат.

Мутлан, «Кугу Какшан» заповедникыште июль тӱҥалтыште кугыжаныш инспектор-влак Арья эҥер ӱмбак вераҥдыме кӱварым олмыктеныт. Тоштыжын конструкцийжак лунчырген улмаш, сандене тудым пеҥгыдемдаш да кӱлмӧ верыште оҥажымат вашталташышт логалын. Тиде кӱварже заповедникын пашаеҥже-шамычлан пӱртӱсым эскерымаш да шымлымаш пашам шуктымо годым эҥер гоч вончен кошташышт кӱлеш.

Август гыч заповедник дене лишкырак палыме лияш шонышо-влак икыт але кок кечаш экскурсийыш миен кертыт. Чылаже ныл маршрут темлалтеш:
«Ир пӱртӱс тӱня» (кок кечаш)ю, «Заповедный мӱкшотарыш»; «Сонарзын изи корныжо», «Колызын кудывечыже» (ик кечаш). Корныш тарванаш шонышо-влак ончылгоч йодмаш дене лекшаш улыт. 5-6 еҥ деч шагал огыл тӱшка погына гын, экскурсийым эртарат. 

А теве «Марий чодра» национальный паркыште гын, пиротехнический изделийым кучылтмо шотышто тӱткышлан верым утларак ойыраш тӱҥалыныт. Закон почеш тыгай изделийым РФ калык-влакын тӱвыра объектшылан, тӱвыра да историй памятниклан шотлалтше, шӱгарла да культовый сооружений, заповедник, заказник ден национальный парк кумдыклаште кучылташ 2012 ий декабрьыштак чарыме.

Паркын администрацийже тышке толшо-шамычлан тидым эше ик гана шижтара. Поснак кеҥежым тушко канаш толшыжо шукын улыт. Законым пудыртышо-влакым изи огыл штраф вуча: должностной лица-влаклан — 15000 гыч 20000 теҥге марте, юридический лица-влаклан — 300000 гыч 500000 теҥге мрте. Эшежым паркыште кызыт пожар ваштареш кучедалме режимым пуртымо.

 С.НОСОВА

Снимкыште: «куварым олмыктымо годым.

Опубликовать в Одноклассники

Добавить комментарий