Кодшо кечылаште Вооруженный Вийын да правам аралыше органлан, сарын, пашан ветеранже-влакын всероссийский мер организацийыштын Йошкар-Оласе пӧлкаже «РФ-ште поснак лӱдыкшӧ подразделений ветеран-влак комитетын кугыжаныш организационный пӧлкаже» ветеран организаций, Россий Почтын Марий Элысе управленийже, «Марий Элыште Сеҥымашын волонтёржо-влак» толкын дене пырля ойыртемалтше акцийым эртареныт. Тудо Семипалатинский полигонышто икымше ядерный пудештарымашлан 70 ий теммылан да ядерный оружий дене Тоцкышто военный ученийым эртарымылан 65 ий теммылан пӧлеклалтын.
Акций кышкарыште поснак лӱдыкшо подразделений-влакын Йошкар-Олаште да районлаште илыше 41 ветераныштлан ты кок кугу событий дене кылдалтше меропритийлаш ӱжмашым кучыктеныт. Мутат уке, нуно чыланат ядерный оружийым кучылтмо ваштареш улыт. А ик тыгай кугу мероприятийже 29 августышто Йошкар-Олаште Радиационный катастрофо ден аварий-влакын жертвыштым шарныме мемориал воктене лиеш.
Йошкар-Оласе ветеран-влак организацийын ик чолга еҥже Надежда Соколован палемдымыж почеш, тӱнямбалне чылаже 41735 ядерный боеголовко аралалтеш. А тӱням пытараш шӱдыжат сита. Кугу Отечественный сар деч вара 1949 ий 29 августышто СССР-ште ядерный оружийым 5 полигонышто терген онченыт.
Россий Почтын Марий Элысе управленийже ветеран адресат-шамычлан тыгай ӱжмашым яра колташ тӱҥалеш. А нине серышыжым «Марий Элыште Сеҥымашын» да МарГУ-н «Ший пагытын» волонтёржо-влак возеныт.
С.НОСОВА.
Снимкыште: акций годым.
Н.Соколован фотожо.
