УВЕР ЙОГЫН

Ранецым чын ойырен налаш кӱлеш

Элыштына икшыве-влакын капкылыштым чын формироватлыме йодыш ик эн ончыко лектын. Тидыже школыш коштмо ранец але портфель денат чак кылдалтын.

«Йоча ден подростко-влаклан палемдалтше продукцийын лӱдыкшыдымылыкшӧ нерген» таможньо ушемын технический регламентше школыш коштмо ранец ден портфельын кугытыштым, нелытыштым, ораташтым, нуным ургаш кучылтмо материалын санитарно-химический, токсикологический лӱдыкшыдымылыкшым шотыш налаш темла.

Ранецын, портфельын да рюкзакын маркировкыштышт пайдаланышын ийготшо нерген увер лийшаш.

Тӱҥалтыш класслаште тунемше-влакын портфельышт, ранецышт але вес сумкашт 700 г деч неле лийшаш огытыл, а кокла да кугурак класслаште шинчымашым погышо-шамычын – 1000 г деч.

Изирак ийготан тунемше-влакын ранецышт формым кучышо, туп пелен шинчыше да нелытым иктӧр шеледыше лийшаш.

 Тӱҥалтыш класслаште тунемше-шамычлан тыгай кугытан ранецым налаш темлалтеш:

— кужыт (кӱкшыт) – 300-360 мм;

— ончыл вел (тӱжвал) ужашын кӱкшытшӧ – 220-260 мм;

— лопкыт – 60-100 мм;

— вачыш сакыме ременьын кужытшо – 600-700 мм деч кӱчык огыл;

— вачыш сакыме ременьын кӱшыл ужашысе лопкытшо (400-450 мм кужытышто) – 35-40 мм деч аҥысыр огыл.

Темлыме кугыт 30 мм ойыртемалтын кертеш.

Тетрадян, книган, моло канцеляр арверан сумкан чумыр нелытшым йочан нелытшым шотыш налын (1:10) шотлен лукман. Икшывын нелытше 30 кг гын, сумкаже 3 кг деч неле лийшаш огыл.  

Тылеч посна портфельыштат, ранецыштат, рюкзакыштат, моло сумкаштат волгыдым ончыктышо элемент да «ваштарешла» икмыняр тӱс, мутлан, ош тӱс пелен шеме лийшаш.

Сай качестван ранецым куштылго, пеҥгыде, вӱд витыдыме, куштылгын эрыкталтше материал дене ургат.

М.ИВАНОВА

Опубликовать в Одноклассники

Добавить комментарий