Тений Марий Элысе социальный аралымаш аланыш кугыжаныш огыл эше ик поставщикым ушымо.
Регионнан Социальный вияҥмаш министерствыжын 2019 ий 28 февральыште лукмо 56-шо №-ан пунчалже дене келшышын, республикысе социальный услуго поставщик-влак реестрыш наркотик, психотропный вещества дене пайдаланыше-влаклан у сообществыште илаш полшымо шотышто «Виктория Плюс» автономный кугыжаныш огыл организацийым пуртымо.
Таче кечылан социальный аралымаш аланыште кугыжаныш огыл кум поставщик пашам ышта.
Ушештарена, регионысо социальный услуго поставщик-влак реестрыш пурышашлан организаций Марий Элын Социальный вияҥмаш министерствышкыже социальный услугым пуымо нерген йодмашым, тыгак организацийын паша опытшо нерген тичмаш уверым возен колтышаш.
Социальный услуго поставщик-влак реестрыш пурашлан вич йыжыҥым эртыман:
- Социальный услугын формыж ден видшым палемдыман;
- Социальный услугым пуымо шотышто пашан видшым организацийын уставышкыже пуртыман;
- Организацийын пашажым тичмашын почын пуышо уверан сайтым ыштыман;
- Социальный услуго поставщик-влак реестрыш пураш келшыше документым Социальный вияҥмаш министерствыш пуыман;
- Социальный вияҥмаш министерствын пунчалжым налман.
Тидымат палемден кодыман, социальный услугым пуымылан бюджет гыч финансированийым регионысо поставщик-влак реестрыш пуртымо кугыжаныш огыл организаций-влак гына налын кертыт:
— конкурс негызеш субсидийым (социальный услугым мӧҥгыштӧ пуышо организаций-влаклан);
— социальный услугым пуымо годым ыштыме роскотлан компенсацийым.
Социальный услуго поставщик лиймыда шуэш, но тидым кузе ышташ огыда пале гын, чыла йодышым Марий Элын Социальный вияҥмаш министерствыжын социальный обслуживанийым организоватлыме шотышто пӧлкаштыже рашемдаш лиеш.
М.ИВАНОВА
