Леонид Маркеловын 235 миллион утла теҥге взяткым налмыж шотышто уголовный дела почеш шымлымашым эртарыме годым ФСБ пашаеҥ-влак теве мом рашемденыт: аффилированный компаний-влак гоч тудо Москваште кок пентхаусым налын улмаш. Нуно элитныйлан шотлалтыт. Акышт — 500 миллион утла теҥге.
Нине илыме вер-влак официально Леонид Маркеловын ава лийшыжын погыжлан шотлалтыт гынат, следователь-влак нуным ончычсо вуйлатышын аффилированный финанс компаний-влак гоч налмыжым доказатленыт.
Ик пачерже «Смоленский бульвар 24» илыме вер комплексын элитный пӧртыштыжӧ пытартыш, шымше, пачашыште верланен. Тудын кумдыкшо — 253 квадрат метр. Акше — 300 миллион наре теҥге. Тиде пачерым 72 ияш Татьяна Маркелова 2014 ийыште налын. Тидын дене пырля ӱдырамаш ты пӧртыштак цокольный пачашыште кок пӧлемым налын. Нунын кумдыкышт — 32 квадрат метр. Ак — 20 миллион наре теҥге.
Вес пентхаусшо Цветной бульварыште новостройкышто, рашрак каласаш гын, 12-шо номеран пӧртысӧ 2-шо корпусышто, верланен. Кумдыкшо — 213 квадрат метр. 200 миллион теҥгелан аклалтеш. Тиде пачер дене пырля тыгак ты пӧртыштак кок пӧлем лийын. Нунын акышт — 15 миллион теҥге.
А Леонид Маркеловын пӧртыштыжӧ обыскым эртарыме годым ФСБ-н рӱдӧ аппаратшын пашаеҥже-влак икмыняр миллион евроаш паша-влакым муыныт. Мо эшеат ӧрыктара — тиде Интерполын тӱнямбал розыскыш увертарыме сӱрет-влак лийыныт.
Особнякыштыже обыскым эртарыше-влак кумдан палыме поэт Александр Пушкинын илымыж годымак лукмо да шкенжын автографан почеламут сборникшым да Николай Карамзинын рукописьыштым, тыгак Возрождений жапысе итальян сӱретче-влак Боттичелли ден Рафаэльын сӱретыштым, скульптор ден архитектор-влакын пашаштым муыныт. Нуно икмыняр лу миллион гыч икмыняр шӱдӧ миллион евро марте акаш улыт, палдара «7х7» изданий. Чыла тидым следователь-влак поген налыныт.
Увертарыме почеш, следователь-влак Леонид Маркеловын погыжым поген налме официальный кадр-влакым тиде арнян савыктат.
«ВКонтакте» социальный сеть дене пайдаланыше-влак тушко поген налме сӱрет-влакын фотографийыштым 18 апрельыште ончыкташ луктыныт. Кажне сӱретыште Леонид Маркелов шкеже ончыкталтын.
Икымшыштыже ончычсо вуйлатыше окна воктене шога. Тушеч Какшан сер коеш. Кокымшышто тудо Воскресенский кӱварыште … Александр Сергеевич Пушкин дене мутланен коштеш. Кумшышто Маркелов рыцарьын вургемжым «чиен шогалын». Ик кидышкыже шлем ден щитым кучен шогалын, весыштыже книга ден Йошкар-Оласе искусство галерей зданийын (тудо Оболенский-Ноготков площадьыште верланен) макетше улыт.
Кӧн чонжо мо верч йӱла…
Л.Камалетдинова.