Курыкмарий велне шочын- кушшо Владислав Скворцов кызыт Йошкар-Ола воктенысе ик ялыште ила.
Кужу жап силовой структурышто пашам ыштен, кызыт сулен налме канышыште. Но эше вич ияшак арама воштыр дене корзиҥгам пидаш тунемме мастарлыкше ӱмырашлык хоббишкыже савырнен. Тудын дене Козьмодемьянскыште эртыше «Бендериаде» пайремыште палыме лийым. Шке ыштыш-кучышыжым ужалаш намиен ыле. Мом вара тудо пидеш? Тӱрлӧ-тӱрлӧ корзиҥгам, воштончыш сакышым, вургем опташ комдым. Тудын кова-кочажат, ава-ачажат ты кидпашам шуктеныт. Ямде арверым ончет да шонет, тудым ышташ кугу нелылыкше укеат. Уло, шол. «Эн нелыже — тиде арама воштыржым ямдылаш, тудым погаш, шолташ, эрыкташ кӱлеш. А шке корзиҥгажым пидаш чоным кандарыме дене иктак», — палемда кидмастар.
С.НОСОВА.
Снимкыште: В.Скворцов.
Авторын фотожо.
