Футбол дене Марий Эл чемпионатын 2-шо йырыштыже эн тале команде-влак вашлийыт. «Шӧртньылан» таҥасыше-шамыч 17 августышто Волжскышто модыт. Икымше верлан лач сеҥымаш гына кӱлеш лиеш гын, оза-влаклан ничьят келшен толеш.
Кызытеш икымше верыште 34 очко дене «Волжск» футбол клуб ончылно кая. Кокымшо верыште – «РМТ» (28 очко), Кумшышто – «Знамя» (16 очко).
14 турышто «Восход» (Красногорский) ден «Знамя» (Параньга), «Волжск» (Волжск) ден «РМТ» (Йошкар-Ола), «ЗПП» (Йошкар-Ола) ден «УОР-СШОР» (Йошкар-Ола), «Сокол» (Шернур) ден «Звезда» (Советский) вашлийыт.
Мут толмашеш, пытартыш кок командыже, «Сокол» ден «Звезда» Шернур посёлкылан 270 ий теммым палемдыме кечын 17 августышто вашлийыт. Ты матч тыгак Физкультурникын кечыжлан (тений 80 ий) пєлеклалтеш. Спорт пайремым ты верыште ГТО нормативым сдатлыме дене тӱҥалаш шонат. Тудыжо «Сокол» стадионышто лиеш. Изирак ийготан-влаклан посна программым ямдыленыт. Нуно 120, 200,800 метрыште вийыштым терген кертыт. Тыгак кумылан-шамычлан шахмат дене турнирыш ушнаш йӧн пуалтеш.
Е.ЭШКИНИНА.
