Шӱкшакым погымо, лукмо да пытарыме у системе Российыштына тений январь гыч пашам ышташ тӱҥалын. Тудо пӱртӱсын арулыкшым веле огыл, айдемын тазалыкшымат арален кодымашке виктаралтын. Кызыт Марий Элын олаа ден районлаштыже ты шотышто кугу паша шукталтеш.
Рӱдолаште сай…
Мутлан, регионнан рӱдолаштыже илыше-влак шӱкшакым кышкыме у пластик бак-влакым аклен шуктенытат. Нуныжо палынак тоштемше металл йоҥгытла дене таҥастарымаште огыт рӱдаҥ, йыгыжге пушым шарен, йырымваш огыт його. Петыртышан да ораван улмыштат моткоч йӧнан: куштылгырак шӱкым мардеж пуалын огеш наҥгае, кайык ден пий-влак логалын огыт керт, контейнерым утларак келшыше кумдыкыш шӱкен наҥгаен вераҥдаш лиеш.
Моло вереат уда лийшаш огыл
Ынде волжан-шамычланат шӱкшакым погымо у контейнер-влакым шындылаш черет шуын. Тыште кызытсе жаплан келшыше пластик контейнер лийын огыл. Рӱдаҥше, кадыргыл локтылалтше, шӱтлышӧ да чот тоштемше бак-влак олаште мыскынь сӱретым шочыктеныт. Адакше спецтехнике ситыдымылан кӧра нуным жапыштыже ястарен шуктен огытыл. Да Юл серыште верланыше ола Марбумкомбинатын жапын-жапын лукмо йыгыжге пушыж деч посна эше шӱйшӧ шӱкшак ӱпш дене темын. Тидыже волжан-шамычын чонышкыштак витен, сандене нуно тӱрлӧ инстанцийыш чарныде гаяк вуйым шияш тӱҥалыныт.
Шӱкшакым погымо тошто йоҥгытым у евроконтейнер дене вашталтыме, торым шупшыктышо машинам ситарыме да «озадыме свалкым» кораҥдыме шотышто кугу да кӱлешан пашам «Волжск ола» ола округым вуйлатыше, «Волжск ола» ола округ депутат-влак погынымашын председательже Надежда Ленькова (снимкыште) виктарен колташ полшен. Тудын йодмыж почеш, Юлсер кундемыште верланыше олашке Марий Элын пӱртӱс поянлык, экологий да йырым-йырысе средам аралыме министрже А.Киселёв, «Благоустройство» ООО-н директоржо Н.Исхаков ден «Чистый город» ООО-н директоржо О.Богатов ик гана веле огыл толын коштыныт. Ситуацийым шымленыт, утларак келшен толшо йӧн-влакым кычалыныт. Да теве 12 августышто Волжскыш кужун вучымо 500 пластик евроконтейнер (снимкыште) ден 3 мусоровозым конденыт – уым! ()
Мут толмашеш, Волжскыш кум мусоровозым гына кондымо дене огыт серлаге, лишыл жапыште шӱкшакым темден иземдыше, палынак шуко торым шупшыктен кертше системан спецтехнике шукырак лиеш. А олам «намысыш пуртен» шогышо тошто контейнер-влакым эркын-эркын тӱрыснек у дене вашталтат.
Торым – шке верышкыже
Тылеч посна ола кумдыкышто санкционироватлыдыме свалке-влакым кораҥдыме паша вийым налын. Мутлан, «Автомобилист» гараж кооператив воктенысе шӱк орам уже кораҥдыме, тудын кумдыкшым шотыш кондымо. Кызыт оласе мэрий ден кооперативым вуйлатыше-влак жаплан келшыше контейнер площадкым ыштыме нерген вашла мутланат.
«Волжск ола» ола округым вуйлатыше Надежда Александровнан мутшо почеш, пеҥгыде коммунал шӱкшакым оптымо у верламат, тымарте погымо тор оран кумдыкламат «Благоустройство» ООО региональный оператор эрыкта. Тудо олаште погынышо пеҥгыде коммунал шӱкшакым график почеш кажне кечын эр-кас еда шупшыкта, а шолдыра торым – арнялан ик гана.
Волжан-шамыч олам тор деч эрыктыме пашам, мутат уке, ужыт, сай вашталтышлан моткоч куаненыт. Но чыла тидым аклат да шӱкшакыштым тетла кушко шуын, тушко кышкымым чарнат гын, эшеат пайдале ыле.
У йоҥгытлан – у йодмаш
Кызыт Волжскышто чыла евроконтейнерым у правил почеш вераҥдат – пеҥгыдемдыме негызыш, авыртышан да леведышан площадкыш. Тыгеже площадкымат, тудын йырысе кумдыкымат кӱлынак эрыкташ да уда ӱпшым палынак иземдаш йӧн лиеш.
Икманаш, вашке Волжск кызытсе жаплан келшыше контейнер площадкан сылне ола лиеш.
М.ИВАНОВА
