Йошкар-Олан кечыжым палемдымашке миллиардер Игорь Рыбаков толын.
Кӧ тудо тыгай? Инвестор да предприниматель, Forbes спискыште 84-ше шога. Икымше ганаже тудо Йошкар-Олаш Российысе «Пятница» телеканалын «Секретный миллионер» реалити-шоушто участвоватлымыжлан кӧра июнь мучаште толын коштын ыле. Тунам тудо мемнан кундемыште вашлиялтше да тудлан полшышо икмыняр ешлан да еҥлан окса пӧлекым ыштен коден ыле. Тыгай радамыш тунам «Журавушка» реабилитационный рӱдерат логалын. Тушто илыше икшыве-шамычлан миллиардер икмыняр гитарым кучыктен, музыкальный кружокым почаш оксам да рӱдерлан кум миллион теҥгеаш целевой капиталлым пӧлеклен.
А кызыт, толшыжла, Игорь Рыбаков ончыч «Чарла миле» куржталмашке ушнен. Тудын деч вара шке шонымашыжым луктын ойлен. Тудо спортым йӧрата, сандене йӧн лекме годым шке капшым шуараш, тазалыкым пеҥгыдемдаш тырша. Спорт тудлан илышыште шонымашкыже шуаш полша. Кодшылан республикыш толын коштмыжымат шарналтыш. Тыште моткоч поро, ойгыш логалаше-влаклан полышым пуаш ямде улшо еҥ-влак илат манын палемдыш. Изи Какшан эҥер серым мокталтыш. «Пятница» каналын «Секретный миллионер» передачыж деч вара тудо Йошкар-Олаш илаш куснымо нергенат шоналтен. Йырже погынышо-шамычлан пиалым тыланыш да тидлан мемнан провинциальный олаштына чыла йӧн уло манын палемдыш.
А кастене Патриарший площадьыште бизнесмен сцене гыч чылаштым пайрем дене саламлен да Йошкар-Олаште илыше эн пеҥгыде еш-влакым палемдыме годым шуко шочшан Ефимовмыт ешлан 200 тӱжем теҥгелан сертификатым кучыктен.
С.НОСОВА.
Снимкыште: И.Рыбаков.
М.Скобелевын фотожо.
