КУЛЬТУР ДА ИСКУССТВО УВЕР ЙОГЫН

Ший памаш воктене — «Муро памаш»

Кодшо рушарнян Кужэҥер районысо Визым ялысе «Марий Швейцарий» каныме базыште икымше гана «Муро памаш» регион-влак кокласе фольклор фестиваль эртен.

Икымыше мелна когарген огыл манаш гына кодеш, муро пайрем пеш сайын эртен, палемдат тушко мийыше-влак. Вес семныже лийынжат ок керт, ты кундем да калыкшат уна-влакым вашлияш эре ямде улыт. Каныме базыжат тидланак келыштаралтын. Тушто шолын лектын шинчыше икмыняр памашыжат, кугу курык ден тайылысе олыкшат, мотор кожержат кумылым савыраш полшат. А памаш вӱдан  мончаш пурен лектат гын, тушко уэш да уэш пӧртылмет шуэш. А тидлан тыште илыше да ты базым нӧлтышӧ чолга еҥлан Роберт Васильевич Антоновлан таум ыштыман.

Но айста фестиваль деке пӧртылына. Тушко республикысе районла гыч веле огыл, Киров область, Татарстан, эсогыл Эстоний гыч творческий коллектив-влак миеныт. Икманаш, финн-угор тӱшкаш пурышо калык-влакын тӱвырашт дене палыме лияш йӧн лийын.

 Пайремын пагалыме унаже-влак коклаште Кужэҥер районысо администрацийым вуйлатыше Сергей Михеев, «Марикоммунэнерго» ООО-н генеральный директоржо Сергей Белоусов лийыныт. Организатор-влак нунылан  мероприятийым эртараш полшымыштлан тауштеныт да шарнымашан пӧлекымат кучыктеныт.

Мо вара пайремыште лийын?. Кидмастар-влакын пашаштым чумырышо ончер пашам ыштен. Мастар-влак ты але вес арверым ышташ туныктымо мастер-классым эртареныт. Уна-шамычлан кундем дене палдарыше экскурсий лийын. Каныме базе кумдыкшымак налаш. Але ты кундемыште шочын-кушшо писатель Чалай Васлийын тоштер-лудмыверышкыже миен толаш лиеш. Тыште кажне ийын Чалай лудмашымат эртарат.

Фестивальын участникше-влак коклаште шукышт республикыште веле огыл, эсогыл йот эллаштат чапым налыныт. Тыгай радамыште Йывансола тӱвыра пӧрт пеленысе «Мурсескем»  калык ансамбльым ончыктыман. Моткоч шкешотан коллектив. Татарстан гыч «У ял» коллектив миен. Эстоний гыч Тарту университетын калык куштымаш ансамбльжын кугу тӱшкаже пайрем шӱлышым ешарен.  

 Кажне коллективым, унам Визым ялыш пурымаште кинде-шинчал дене вашлийыныт. Участник-влакым кондышо автобус, машина шуко лийын. Пайрем программе 45 номер гыч шоген. А кастене Эстоний гыч толшо артист-влак шке мастарлыкыштым Йывансола тӱвыра пӧртыштӧ ончыктеныт.

Ты кундемыштак Йошкар-Олаште Марий тӱр рӱдерым вуйлатыше Ираида Степанова шочын-кушкын. Тудат шочмо вержым чапландарыме пашам ворандара, турист-влакым ты базыш канаш кондыштара. Тудын ойлымыж почеш, шочмо кундемыште чонжак мура. «Фестивальыш толшо кажне коллектив шке ойыртемалтше кумылжым конден, тудын тӱсшым пойдарен. Калыкна шке мурыжо-влакым пала, пайремлан чияш шке вургемже уло гын, тидат тудын поянлыкше», — палемден И.Степанова.

Светлана НОСОВА.

Снимкылаште: «Муро памаш» фестиваль годым.

Опубликовать в Одноклассники

Добавить комментарий