Морко районышто «Лӱдыкшыдымӧ да сай качестван автомобиль корно» национальный проект кышкарыште Морко – Уньжа кугорнын икмыняр участкыжым олмыктат. Тиде пашам планыш корнын технический состоянийжым шотыш налын пуртымо. Олмыктышаш корнын кужытшо 2965 м да кумдыкшо 17441 кв.м шуыныт. Контрактын акше – 39992 теҥге.
Корнын негызшым битум эмульсий ден шаргӱм ешарыман йӱштӧ регенераций йӧн дене ышташ, кутынь да тореш профильым тӧремдаш, шартышын ӱлыл ден кӱшыл лончылажым пышташ палемдыме. Тыгак пуч-влакым йошкын да лавыра деч эрыктат. Кандаш щитокым, ныл стойкым, палым пуышо 35 изи меҥгым шогалтат. 2901,0 м кужыт корным термопластик да чия дене «шелыт».
Таче кечылан палемдыме пашан 95,6 процентшым шуктымо. Корно палым, палым пуышо изи меҥгым шындылаш, разметкым ышташ гына кодын. Олмыктен пытарыме деч вара кугорно куд метр лопкытан лиеш. Пашам 23 август марте ыштен шуктышаш улыт. Тудын подрядчикше – «Марий Эл Дорстрой» АО.
«Лӱдыкшыдымӧ да сай качестван автомобиль корно» национальный проектым илышыш умбакыже пуртымо жапыште Морко – Уньжа кугорным тичмашнек шотыш кондаш палемдыме.
М.ИВАНОВА
