Звенигово районысо Красногорский посёлкышто верланыше «Сказка» йочасадыш коштшо изи ӱдыр-рвезе-влакын ача-авашт Общероссийский калык фронтын Марий Элысе пӧлкашкыже вуйым шийыныт. Нунын мутышт почеш, школ деч ончычсо тӧнежын пашаеҥже-влак ача-ава-шамыч деч закондымын оксам погат.
Кугыеҥ-шамычын каласкалымышт почеш, йочасадым вуйлатыше группыласе кумдыкым олмыкташ, ты шотыштак окналам вашталташ икымше погынымашыштак 7000 теҥге дене погаш каласен. Тылеч вара ача-ава комитет воспитательын вуйлатымыж почеш ремонтлан, модышлан да канцелярский сатулан оксам погат.
«Тиде сӱрет шушаш тунемме ийынат вашталтын огыл: 24 июньышто ача-ава чатыште воспитательын лӱмжӧ дене ремонтлан оксам погаш кӱлмӧ нерген возымо. Ме тидын нерген Звенигово районын образований пӧлкашкыже шижтарышна, туштыжо йодышым лончылаш сӧрышт. А тыгодым, пытартыш жапым палемден, мемнан деч оксам йодыт», – возат ача-ава-шамыч.
ОНФ-ын «Образований» тематический площадкыжын модераторжо Татьяна Глушкован мутшо почеш, ача-ава деч оксам налмаш – законым пудыртымаш.
«Вуйшиймашым тергаш полшымо йодыш дене районысо прокуратурыш лекна. Тиде пашаш тыгак регионысо Образований да науко министерствым ушышна», – манеш модератор.
М.ИВАНОВА
