12 августышто Волжск администраций вуйлатышын обязанностьшым шуктышо А.Волков оперативный совещанийым эртарен. Тушто ведомственный учрежденийлаште арня мучко могай пашам ыштыме нерген каҥашеныт.
Мутлан, МТсК-ан вуйлатышыже 8-ше №-ан котельный гыч шокшо вӱдым кугарнян пуат манын палемденыт, а 14-ше №-ан котельный 14 август гыч пашам ышташ тӱҥалеш. Нине объектлаште ончылан шындыме чыла паша ышталтын.
Тыгак шыжылан, телылан илыме верлаште шокшым пуымо шотыштат мутым луктыныт. Тидын шотышто управляющий компаний-влак чолган тыршат. Таче кечылан тӱҥ задаче – шокшым пуышо камер-влакым жапыштыже ямдылен шукташ.
Вашлиймаште тыгак тургым дене кылдалтше туткар нергенат йодышым нӧлталыныт. Мутлан, кызыт поҥгым погымо жап. Тыгодым шуко еҥ чодыраште лӱдыкшыдымылыкым ок эскере.
Чодыраште йомында гын, шотыш налаш уто огыл:
- Чодыраш кайыме деч ончыч родо-тукымдам, палымыдам кушко кайымыда нерген шижтарыза. Йыҥгыртен огыда керт гын (телефонда йомын, аккумулятор ок ыште), лач нуно тендан нерген палаш тӱҥалыт.
- Автомобиль дене тарваненда гын, палемдыме вер марте миен шуаш да мӧҥгеш пєртылаш бензинда сита але укем тергыза.
- Пеленда обязательно телефоным, кӱзым, шырпым, фонарикым, йӱр деч авыртышым, компасым, насекомый деч мазьым, йӱаш вӱдым, кеч изиш кочкышымат налза.
- Волгыдырак, чеверрак, икманаш, мӱндыркӧ койшо вургемым чийыза.
- Палыме маршрут, корно деч мӱндыркыжак ида кай. Купышкыла кайымекат, корныдам шарнаш тыршыза.
- Пырля тарваныме йолташда дене йомында гын, ик верыштак шуко жап вучыза. Чодыра гыч шке семын лектын ода керт – телефон дене йыҥгыртыза (оксада уке гынат, «112» номер дене лиеш), лӱмнердам, фамилийдам да куштырак улмыдам каласыза. Можыч, полшышо семын квартальный меҥгын номерже але моло предмет улыт, умылтарыза.
Чодыраште айдеме вучыдымын йомеш. Тыгодым нунылан ны ийгот, ны келге шинчымаш огыт полшо, сандене чылажланат ямде лийман. Тыгай годым айдемын тӱҥ задачыже – илен лекташ вий-куатым муаш!
Е.ЭШКИНИНА.
