Футбол дене Марий Элын чемпионатше умбакыже шуйна. Мутат уке, кажне командыже тыршен модеш.
4 августышто Шернур посёлкышто верысе «Сокол» ден «Тарханово» футбол клуб-влак вашлийыныт. Модмаш сеҥышым палемдыде кодын, тудо ничья дене иктешлалтын. Соперникын капкашкыже мечым пуртышаш йӧнышт оза-шамычын шуко лийын, но тидыжым нуно кучылтын огытыл. Мече я капка меҥге воктеч чоҥештен эртен, я ӧрдыжкӧ каен. Адакшым, ончышо, тыгак модшо-влакын палемдымышт почеш, ты вашлиймаш моткоч торжан эртен.
Кызытеш турнир таблицыште «Сокол» команде – кудымшо верыште.
Черетан вес вашлиймаш 11 августышто лийшаш ыле, но, тӱрлӧ амаллан кӧра тудым 21 августыш кусареныт.
Тачысе кечылан футбол дене Марий Элын чемпионатыштыже модшо команде-влак коклаште 28 очко дене икымше верыште «Волжск» (Волжск ола) кая, кокымшышто – «РМТ» (22 очко, Йошкар-Ола), кумшо верыште – «Знамя» (16 очко, Параньга район).
Е.ЭШКИНИНА.
