УВЕР ЙОГЫН

Лучко минутдам ида чамане!

6-9 августышто Марий Элыште Россий Минздравын ВИЧ-инфекцийлан яра аноним эскпресс-тестирований шотышто «ВИЧ-лан тест: Экспедиций 2019» всероссийский акцийже эрта.

Тестированийын мобильный пунктшо-влакым вераҥдыман площадке-влак палемдыме кундемлаште тыгай радам дене пашам ыштат:

6 августышто – Волжск олаште «Лето» ужалыме рӱдер воктенысе площадкыште (Ленин урем, 60-шо пӧрт);

7 августышто – Козьмодемьянск олаште «Потенциал» заводын тӱҥ проходнойжо воктенысе площадкыште (Быстров урем, 1-ше пӧрт);

 Ола шотан Медведево посёлкышто (Рӱдӧ площадьыште);

8 августышто – Йошкар-Олаште Тӱвыра да каныме рӱдӧ паркыш пурымо арке ончылнысо площадкыште.

Акцийым эртарыме жап – 12 гыч 18 шагат йотке.

Марий Эл ВИЧ-инфекций дене авалталтше регион-влак радамыш ок пуро. Тыге гынат республикысе калыкым медицине велым тергыме паша ий еда вияҥын толеш, мутлан, 2018 ийыште ВИЧ-инфекцийлан чумыр калык гыч 23 процентшым тестироватлыме.

2019 ий 1 июльлан Марий Элыште айдемын иммунодефицит вирусшо дене кылдалтше чер дене авалталтме показатель 100 тӱжем еҥлан шотлымаште 10,7 лийын да кодшо ий тыгаяк жап дечын 29,1 процентлан волен, а российысе показатель деч – кум пачаш. 2019 ийын икымше пелыштыже ВИЧ-инфекций дене черланыме показатель тыгай лийын: Волжский районышто – 19,9, Медведево районышто – 16,4, Йошкар-Олаште – 9,5, Звенигово районышто – 2,5.

Марий Элыште ВИЧ-инфекций дене черланыме у случай-влак тӱҥ шотышто половой корно дене кылдалтыныт – 70 утла процент. Тений 1 июльлан диспансер учётышто айдемын иммунодефицит вирусшо дене инфицироватлалтше 1394 еҥ шоген. 2018 ийыште антиретровирус терапийым 810 черле эртен (чумыр чот гыч 60,8 процент), 2019 ий 1 июльлан – 937 еҥ (чумыр чот гыч 67,2 процент).

Эпидемий ситуаций кугу тӱткышым калыклан ойыраш йодеш.

«ВИЧ-лан тест: Экспедиций 2019» всероссийский акцийын цельже калыкым ВИЧ/СПИД йодыш дене палдарыме, ВИЧ черан граждан-влаклан калыкыште ласканрак коштын кертме йӧным ыштыме да ВИЧ-инфекцийлан тестированийым эрташ кумылаҥдыме дене кылдалтын.

Акций Россий Федерацийын Тазалыкым аралыме министерствыжын да Горьковский автомобильный заводын (ГАЗ) тыршымышт дене эрта. Тестированийын мобильный пунктшо-шамыч – ош тӱсан бортышкышт йошкар лопка тасмам сӱретлыман да «ВИЧ-лан тест: Экспедиций» манын возыман брендироватлыме ГАЗ автомашина-шамыч Россий Федерацийын 40 регионысо 191 олаже мучко кудал эртат.

Тестированийын мобильный пунклаштыже кажне еҥ айдемын иммунодефицит вирусшылан  10-15 минут жапыште яра тергалтын кертеш.

Экспресс-тестирований годым специалист-влак ВИЧ-инфекций дене кылдалтше йодышла дене консультацийым пуат, вирус пижме йӧн дене палдарат, тергалтмын кӱлешлыкше нерген умылтарат.

«ВИЧ-лан тест: Экспедиций 2019» всероссийский акцийым мучашлыме  мероприятий 9 августышто 11 шагатлан Республикысе курчак театрыште (Йошкар-Ола, Царьградский проспект, 35-ше пӧрт) лиеш. Тушко исполнительный кучем органлан, медицине сообществылан, мер организацийлан, тӱшка увер средствылан официальный представительыштым ӱжмӧ.

М.ИВАНОВА.

Опубликовать в Одноклассники

Добавить комментарий