«Самырык профессионал-влак» (WorldSkills) Тӱнямбал чемпионат тений Озаҥыште лиеш, маныт. Тудо кунам эртаралтеш? Марий Эл гыч тушко мастарлыкым ончыкташ тӱҥалыт мо?
И.Казанцев,
Йошкар-Ола.
Марий Эл Образований да науко министерствын профессионал образований пӧлкам вуйлатыше Ф.Яруткина тиде йодышлан тыге вашештен:
– Самырык-влакын профессионал мастарлык шотышто WorldSkills Competion 2019 Тӱнямбал чемпионат Озаҥыште тений 22 гыч 27 август марте эрташ тӱҥалеш.
Российын историйыштыже тиде направлений дене тыгай кугу мероприятий икымше гана лиеш. Тушто шке моштымашым тӱнян 63 элже гыч 1300 профессионал ончыкта. А Россий Федерацийын чапшым тудын Национальный сборныйышкыжо пуртымо 63 участник аралаш тӱҥалеш, нуным элнан 25 регионжо гыч ойырымо.
Чаманен каласыман, тиде сборныйыш Марий Эл гыч иктат логалын огыл, но кандидат-влак лийыныт. Туге гынат чемпионатын «Посетитель» программыж почеш, республикна гыч тушко кундемнан школлаштыже тунемше 200 йоча кая. Нунылан таҥасымашым ончаш чыла йӧн ышталтеш. А 22 августышто чемпионатым торжественно почмашке нунын дене пырля Марий Эл образований да науко министр Н.Адамова, тыгак республикысе техникум ден колледжлам вуйлатыше-шамычын делегацийышт каят.
Г.КОЖЕВНИКОВА.
