КУЛЬТУР ДА ИСКУССТВО

А мелнажым тамлен шуктен огытыл

Эстонийысе Выру олаште 18-21 июльышто эртыше фольклор фестивальыш Кужэҥер район Йывансола тӱвыра пӧрт пеленысе «Мурсескем» фольклор ансамбль миен коштын. 

— Эстон мландыште участник-влак тӱрлӧ эл гыч лийыныт: Испаний, Германий, Польша да молат, — каласкала коллектив вуйлатыше, Россий культурын сулло пашаеҥже Евгений Каменщиков. — Мемнан деч посна Россий гыч эше калык мурым мурышо «Ростань» ансамбль лийын. Фестиваль жапыште ме шуркам упшалын куштенна, тыгак Пектабай вел совым кырен, Кужэҥер вел сӱан куштымаш-влакым, тывырдыкым ончыктенна. Тиддеч посна шӱвырым оҥарен, тӱмырым пералтен, ияковыжым, гармоньым шоктымо почеш куштенна. Калык совым кырен, шокшын вашлийын. Мемнам ончаш Тартушто илыше марий-влакат миеныт ыле. Нунын тауштен ойлымышт чонлан моткоч сайын чучын.

Евгений Анисимовичын ойлымыж почеш, фестиваль жапыште участник-влаклан кугу ярмиҥга эртен. Тушто тӱрлӧ кидпашам, сувенирым ончаш, ямдылыме кочкышыштым тамлаш луктыныт.

— Выру олан мэржын приёмыштыжо лийынна, — каласкала ансамбль вуйлатыше. — А вес кечынже тудо ола покшелне верланыше паркыште мелнам кӱэштмыж дене чот ӧрыктарен. Тамле кочкышыж дене кумылан кажне еҥым яра сийлен. Мелна руашыже кок кугу ведра лийын! Меат тамлен ончаш шоненна, но черет пеш кужу ыле, шол.

А кызыт «Мурсескем» ансамбль Финляндийыш каяш ямдылалтеш. Август кыдалне туштат чапле фестиваль лийшаш.

А.БАЙКОВА

Фотом ансамбльын альбомжо гыч налме

Опубликовать в Одноклассники

Добавить комментарий