Республикыштына физический культурым да спортым вияҥдышашлан ятыр ышталтын. Айста пытартыш ийлам шергал лектына.
2017 ий
Марий Элыште 5 спорт школ, 10 олимпийский резерв спорт школ, 1 спорт подготовко рӱдер, 1 олимпийский резерв училище лийыныт. Идалык мучашлан 1704 спорт сооружений пашам ыштен. Нунын коклаште 10 стадион, 999 плоскостной сооружений манме, 389 спортзал, 36 бассейн да молат лийыныт.
Ты ийын республикысе спортсмен-шамыч тӱнямбал, всероссийский да регион-влак кокласе таҥасымашлаште чылаже 286 медальым сеҥен налыныт.
2018 ий
Спортшкол-влакым кугемдаш манын, икмыняр кугыжаныш бюджет учрежденийым реорганизоватленыт да иктым весыж деке ушеныт. Тыгодым «Йошкар-Олан комплексный спортшколжо» у спортшкол почылтын.
Тӱрлӧ кӱкшытан таҥасымашлаште спортсменна-влак 309 медальым — 102 шӧртньӧ, 109 ший, 98 той медальым – сеҥен налыныт. «Российын спорт мастерже» спортивный чап лӱмым 30 спортсменлан, «Спорт мастерыш кандидат» спортивный разрядым 237еҥлан пуымо.
Тиде ийынак Марий кугыжаныш университет пелен Сергей Карякинын шахмат школжо почылтын.
2019 ий
Тений идалык тӱҥалтышлан ончалмаште республикыште 1703 спорт сооружений пашам ышта. Нунын коклаште 10 стадион, 388 спортзал, 37 бассейн да молат еҥ-влакым кумылын вашлийыт.
Идалык тӱҥалтышланак Российын сборный командышкыже спортын 8 видше дене 72 спортсмен пурталтын. Ныл тылзе жапыште 142 спорт мероприятий лийын, тышеч 22 – всероссийский ден межрегиональный таҥасымаш-влак.
Российысе «РУСАДА» антидопинговый агентстве онлайн йӧн дене регион-влакын рейтингыштым ямдыла. Тушто Россий Федерацийын кажне субъектыштыже ты шотышто могай кугыт паша шукталтме ончыкталтеш. 7 майлан Российысе чыла регион-влак коклаште ты рейтингыште Марий Эл
2-шо верыште лийын!
Физкультур да спорт дене республикыште шукырак еҥ кылым кучыжо манын, тений 19 апрельыште Марий Эл вуйлатыше Тазалык да спорт кечым эртараш тӱҥалме нерген пунчалым луктын. Тудын дене келшышын, тыгай кече тылзылан ик гана чыла спорт объектыште лийшаш.
23-25 апрельыште Москваште SportB2B EXPO&FORUM форум ден спортсооружений-влак выставке эртен. Тушто «Марий Эл» Ий полатна «Эн сай Ий полат» номинацийыште сеҥен.
Иктешлыме семын
Республикыште ий еда 200 наре кугу спорт мероприятий-влак эртаралтыт. Нунын коклаште 40-50 – всероссийский ден межрегиональный таҥасымаш-влак. Тушко 60 утла тӱжем еҥ ушна.
2024 ийлан кундемыштына илыше 55% марте калык физкультур да спорт дене кылым эреак кучышаш манын палемдалтеш.
Мутлан, спорт нерген республик вуйлатыше Александр Евстифеев тыге ойлен: «Спорт – тиде йылмылан кумылаҥмаш гаяк. Йылме шотышто йодмаш уке гын, тудым тунемаш огеш лий. Спорт мероприятийымат тугай площадкыште, кушто спортсмен-влак уке улыт, эртараш огеш лий».
Чыным ойлаш гын, физкультур але спорт дене кылым кӱштымӧ почеш кучаш тӱҥалаш неле. Тидлан эн ончычак айдемын шкенжын кумылжо лийшаш. А кумылаҥдаш кумдан чапланыше спортсмен-шамычын ойыштат полшен кертыт. Теве бокс дене тӱнян чемпионжо Костя Дзю тыге каласен: «Ом керт» манын нигунам ит ойло. «Кертам» ман, «но кызыт огыл». Тиде ойсавыртышым эреак шарнаш гын, спорт дене кылым кучаш тӱҥалаш веле огыл куштылгырак, кунам-гынат таҥасымашлаштат сеҥымашке шуаш лиеш!
Любовь Камалетдинова
