Кодшо шуматкечын Йошкар-Олаште, Ленин площадьыште, Шернур районлан пӧлеклалтше ялозанлык ярмиҥга эртаралтын.
Тиде гана Марий кундем деч посна Чуваш Республик, Киров, Ростов областьла гыч пищевой да перерабатыватлыше промышленность предприятий, фермер да шке озанлыкла гыч чылаже 160 участник тӱрлӧ кочкыш сатум ужалаш конден. А Шернур район творческий коллектив-влакын, тидын шотыштак «Ассорти» йоча ансамбльын, оҥай программан выступленийыштым ончыктен. Марий тӱрым ямдылыше «Унавий» студий ден декоративно-прикладной творчестве мастар-влак марий костюмым, тӱрлымӧ да сӱан вургемым, бисер ден коваште гыч ямдылыме сӱретым, пу гыч ыштыме арверым, курчакым ончыкташ да ужалаш конденыт. Шернур райпон кугече куличшым, макарон сатужым калык кумылын налын. А «Шернур сырзавод» ЗАО каза да ушкал шӧр гыч ямдылыме кочкыш сатужым ярмиҥгашке толшо-влак коклаште эртарыме весела конкурслашке ушнышо-влаклан приз семын кучыктен.
Вес ялозанлык ярмиҥга 6 майыште Ленин площадьыште лиеш. Тиде гана тудо Звенигово ден Медведево район-влаклан пӧлеклалтеш.
В.Смоленцев.
