12 гыч 20 июль марте Йошкар-Олаште Инвалид-влакын III всероссийский кеҥеж спартакидышт эрта.
Тушко Российын 65 регионжо гыч кок тӱжем утла еҥ ушнен. Спартакиадын финал таҥасымашыштыже сокыр, соҥгыра, уш-акыл шотышто экшыкан, церебральный паралич черан да ошкылмо-тарванылме шотышто йӧсланыше-влак бочча, куштылго атлетике, ӱстембал теннис, иймаш, голбол, дзюдо, футбол дисциплинылаште чолгалыкым ончыктат.
Архангельск область гыч 28 еҥан команде толын. Тудым Елена Николаевна Яковлева вуйлата.
Нунын кокла гыч Никита Павлов, Ирина Агеева, Иван Гаринов иймаште таҥасеныт. Никита ший, а Иван бронзо медальым налыныт. Спортын тиде видшылан куд ияш улмышт годым шӱмаҥыныт. Шке кундемыштын Российын чапшым ятыр вере араленыт, сеҥымаш денат пӧртылыныт.
— Но тыгай чапле спорт пайремым тыште икымше гана ужына. Мемнам шокшын вашлийыныт, чыла вере ужатен коштыктат, яра пукшат, экусурсийым эртарат… Икманаш, Марий Элын рӱдолаже унам вашлияш эрак ямде! Ола мотор, уремлаште яндар, чыла вере эрыктыме, чиялтыме, Изи Какшан эҥер воктене моткоч сӧрал, чылт йомакысе гай. Тыште илыше-влак шкештым пиаланлан шотлышаш улыт. Спартакиаде кугу кӱкшытыштӧ эрта. Тышке толмо дене шуко спортмен дене палыме лийынна. Ончыкыжым кылым кучаш кутырен келшенна.
А.Байкова.
