УВЕР ЙОГЫН

Йочам ияш туныктыманак

Марий Элысе эҥер ден ерлаште йӱштылаш нимогай лӱдыкшӧ уке.

Шукерте огыл Роспотребнадзорын республикысе управленийжын специалистше-влак шуко вере вӱдын, пундашысе ошман санитарно-химический составыштым, микробиологий, паразитологий показательыштым ятыр гана тергеныт. Чыла вере гигиене нормативлан келшен толмым палемденыт. Палашлан: тачысе кечылан Марий Элыште 84 рекреаций зоно да 38 пляж пашам ыштат.

  Экологий велым вӱдыш пураш лӱдыкшыжо уке манына гынат, еҥ-влакын шкеныштын тӱткылыкышт, илышым аклыме койышышт начаррак. Тидлан кӧрак тений кеҥежым вӱд объектлаште 11 еҥ илыш дене чеверласен. Тышеч кок еҥже Татарстан ден Чуваший гыч лийыныт. Тидын нерген Россий МЧС-ын Марий Элысе управленийжын вӱд объектлаште еҥ-шамычын лӱдыкшыдымылыкышт шотышто пӧлкам вуйлатыше Александр Крикунов увертарен. Мутлан, кодшо ийын вӱдыш пурен кайышыже ныл еҥлан шукырак лийын. Тӱҥ шотышто тений тыгай туткарже йӱштылаш келыштарыдыме верлаште йӱштылаш пурымылан кӧра лийын. Утларакше кочывӱдым подылшо пӧръеҥ-влак вӱдыш пурат да илыш дене чеверласат.

     Тений кеҥеж тӱҥалтыште изи судно дене кылдалтше туткарат лийын. Волжск ола воктене Юл эҥерыште катер якорьышто шогышо «Казанка М» мотопушыш керылтын. Юмылан тау, пушышто лийше вате-марият, катерым виктарыше еҥат сусырген огытыл. Катержын озаже титакан улмаш.  

      Тений верлаштат калыклан канаш 16 пляжым келыштарыме. Муниципальный пляж 3 гыч 16 марте ешаралтын. Советский, Юрино да Марий Турек районлаште нуным тӱзатен келыштареныт. Тидын дене пырля каныме базе, санаторий, йоча-влакын тазалыкыштым пеҥгыдемдыме лагерь-влак пелен 25 пляж пашам ышта.

    Кажне ийын республик кумдыкысо эҥерлаште байдарке дене ийын коштшо-влак шукемыт. Тыге канаш шонышо-влак ӧрдыж кундемла гычат кумылын мемнан деке толыт. Мутлан, тений гына 12 йоча тӱшка  лийын. коштын. Мутат уке, нуным мемнан утарыше-влак ужатен коштыныт. 9 тушкаже ӧрдыж кундемла гыч лийыныт.

Александр Крикунов чаманен палемдыш: республикыште школыш коштшо тунемше-влак кокла гыч 45 процентше ийын ок мошто. Кеч пытартыш ийлаште ятыр бассейным пашаш колтымо. Тыгай сӱретше дене Российын моло субъектше моктаненжат огыт керт. Сандене шке икшывым ияш туныкташ манын, эн ончыч ача-ава-влак тургыжланышаш улыт. Тунам вара йочам эҥерыш колташат лӱдыкшӧ ок лий. А кеҥежым нуно вӱд воктеке логалыт гын,  тушко пурен лекташ кумылышт лектешак.

  С.Носова.

 

Опубликовать в Одноклассники

Добавить комментарий