12 гыч 20 июль марте Йошкар-Олаште Инвалид-влакын III всероссийский кеҥеж спартакиадышт эрта. Тушко Российын 65 регионжо гыч 2000 наре еҥ ушнен.
Марий Элын командыже спортын ныл видыштыже таҥасен. Уш-акыл шотышто экшыкан-влакат (ЛИН) иймаште вий-куатыштым тергеныт. Йошкар-Ола гыч Клим Румянцев икымше верым сеҥен налын да икымше шӧртньӧ медальым республикылан конден.
— Спортын иймаш видше дене кум ий кылым кучем. Тиде жапыште ятыр вере таҥасымаште лийынам: Кировышто, Саранскыште… Шукыж годым сеҥыше радамыш лектам, медаль дене пӧртылынам. Мӧҥгыштӧ латкок шӧртньӧ, кандаш ший да ныл бронзо медалем уло, — каласкала спартакиадыште Марий Элын командыж гыч ик эн ончыч шӧртньӧ медальым сеҥен налше Клим Румянцев. – Спартакиадын финал таҥасымаштыже мый 200 метр кужытым 2 минутат 11 секунд ийынам. Саламлымаш годым икымше верыш лекмем нерген увертарымекышт моткоч куаненам ыле, ӱшанымем гаят чучын огыл.
А спартакиадыште республикнан чапшым аралаш — кугу чап, пиал. Тиде тат шуко жаплан шарнаш кодеш.
Алевтина Байкова
Авторын фотожо
