18 июльышто индеш шагат эрдене «Дружба» стадионыш Инвалид-влакын III всероссийский кеҥеж спартакидын организаторжо, спортсменже, тренерже да волонтёржо-влак погыненыт.
Амалжат кугу — куштылго атлетикыште эн виян спортсмен-влакым саламленыт. Ошкылмо-тарванылме шотышто йӧсланыше-влакын 200 да 1500 метрыш куржаталмаште да сокыр-влак коклаште кужытыш тӧрштымаште сеҥыше-влаклан Марий Эл Правительстве председательын алмаштышыже Илга Дравниеце грамотым да дипломым кучыктен.
Куанаш кӱлеш, сеҥыше-влак коклаште Марий Элын командыж гычат ӱдыр лийын. Светлана Назарова 200 метрым куржмаште шӧртньӧ медальым налын.
— Икымше лиймемлан моткоч йывыртенам. Но сеҥымашке шуаш шуко вийым пышташ кӱлын. Шӧртньӧ медаль — тиде куан шкемын веле огыл, а уло командын, — ойла Света. — Куштылго атлетике дене ик ий наре кылым кучем. Але марте тыгай кугу спорт таҥасымашке лектын омыл, лач тыште кугу спортыш икымше ошкылым ыштенам. Тиде спартакиаде у йолташым муаш, вий-куатым тергаш да ончыкташ йӧным ыштен. Спартакиаде неле-йӧсым ончыде, уло ӱнарым пыштен умбакыжат таҥасаш, у кӱкшытыш шуаш тарата.
А.Байкова
Авторын фотожо
