Э.Сапаев лӱмеш опер да балет академический театрын артистше-влак Сочиште илыше-влакым да курорт олаш унала толшо-влакым куандарат.
13-18 июльышто тусо (Зимный) Теле театрыште «Кеҥеж балет тургым» II фестиваль эрта. Опер да балет театр тушто ӱмаштат мастарлыкым ончыктен да лач мемнан-влаклан икымше фестивальым почаш ӱшаненыт улмаш.
Ты гана театр коллектив «Лебединое озеро», «Золушка» да «Щелкунчик» балет-влакым ончыкта.
Артист-влакын ойлымышт почеш, балетым ончаш калык зал тич чумырга да моткоч шокшын вашлиеш.
Палемдыман, Теле театрын сценыштыже марий театрын артистше-влак ик гана веле огыл «Тӱнямбалсе самырык балет» конкурсышто лауреат лӱмым налыныт.
А.Байкова.
