ДТП-ш логалынам, корныеҥым тӱкенам. Тудыжо мыйын машина ончыко куржын лектын. Ни административно, ни уголовно мут кучаш шогалтен огытыл, молан манаш гын титакем уке улымым пеҥгыдемденыт. А теҥгече рашемеын: корныеҥет моральный эҥгеклан тӱлаш йодын судыш йодмашым возен. Тыгай условий годым мый тӱлышаш улам мо?
О.Такменев
Йошкар-Ола.
Йодышлан Медведево районысо прокурорын алмаштышыже Роман Голиков вашештен:
— РФ Граждан кодексын 1079-ше статьяж дене келшышын, йырысе-влаклан кугу лӱдыкшым шочыктышо паша дене гражданинын илышыжлан але тазалыкшылан ышталтше эҥгеклан, тиде лӱдыкшылан амалым пуышо еҥын титакше уло але укем ончыде тӱлыктат. Тидын деч посна Граждан кодексын 1100-шӧ статьяж дене келшышын, эҥгекше лӱдыкшым шочыктышо источниклан кӧра ышталтын гын, тыгак озажын титакше уло але укем шотыш налде, моральный эҥгеклан компенсацийым тӱлыктат. Сандене корныеҥ ДТП дене ышталтше эҥгеклан да моральный эҥгеклан оксам тӱлаш йодмаш дене судыш лекташ праван.
