Йошкар-Олаште эртыше инвалид-влакын кумшо всерооссийский спартакиадышкышт Российын 65 регионжо гыч 2 тӱжем наре участник толын.
Нуно куштылго атлектикыште, футболышто, ӱстембал теннисыште, дзюдошто, боччаште, иймаште, голболышто нуно таҥасат. Участник-влакым «Дружба» стадионышто, Вӱд полатыште, «Спартак» комплексыште, теннис кортышто ужаш лиеш. Таклан огыл спартакиадым эртараш Йошкар-Олам ойырен налыныт. Молодёжный политике, спорт да туризм министр Лидия Батюкован палемдымыж почеш, тидлан марий рӱдолаштына тыгай паралимпийский спортын видше-влак дене таҥасымашым эртараш йӧнна ситышын. Кеч участник-влаклан илашышт верым келыштараш логалын, кушто кӱлеш гын, оралтыш коляске дене пурен лектын кошташ пандус-влакымат угыч ыштыме.
Лач нине вид-влак паралимпийский модмашын программышкыже пурталтыныт. Мутлан, боччам налаш. Шукынжо йодыт: мо тиде тыгай? Бочча — мече дене модмаш, боулинг, петанк, кёрлинг деке лишке шога. Тудым лӱмын ДЦП, неврологийлан кӧра кид, йол начарын але йӧршеш пашам ыштыдыме еҥ-влаклан шонен луктыныт. Тиде модыш кид-йолым мыняр-гынат тарватылаш полша, санденак медик-влакын ойлымышт почеш, черле еҥ эркын, но тазаҥеш. Тудо кид дене але полшаш ыштыме посна наста (рампе) дене мечым кортыш кудалтышаш. ДЦП черан икшывылан тидыжымат ышташ куштылгыжак огыл. Теве Калмыкий гыч Варгенов Джорди дене палыме лийна. Валентина аважын полшымыж дене кум ий наре ты спорт дене кылым куча. Але марте Алексиношто, Раменскийыште, Сочиште, Крымыште таҥасен.
Але налаш дзюдом. Шоналташ гын, начарын але сокыр еҥлан спортын ты видше дене кучедалаш манаш веле. Екатеринбург гыч Анастасия Черепанова дене палыме лийна. Свердловский область гыч спортын ты видше дене ик еҥ гына лийын. Идалык утларак заниматла. Дзюдо тудлан илыш вийым ешара. Спартакиадын икымше кечынжак сокыр-влак коклаште дзюдо дене таҥасымаш эртыш. Участникше шуко лийын огыл. Кеч сеҥыше-влакым индеш весовой категорийыште палемденыт.
А теве ӱстембал теннисыште икымше кечын таҥасымаште Марий Эл деч ныл участник лийын: кок рвезе — Даниил Зайцев ден Егор Коновалов да кок ӱдыр — Алина Кузьмина ден Надежда Махикова. Рвезе-влак сай результатым ончыктеныт, финалышкат лекташ шонат.
Чынжым каласаш гын, тыгай ойган еҥ-влаклан спортын нине видыштыже сеҥымашке шуаш манын, тыглай илышыште гаяк шкем сеҥен толашышт логалеш. Кок тӱжем наре участник кокла гыч кажныже могай-гынат чер дене илышыштыже «кучедалеш». Но тидын годым ойырен налме спортлан кӧра нунын койышышт, илаш кумылышт пеҥгыдем толеш.
Поснак ӧрдыж регионла гыч толшо участник-влак дене мутланымаш гоч шижалтеш: Йошкар-Ола нуным пеш поро кумыл дене вашлийын. Мутлан, Моско областьысе делегацийым вуйлатыше, Опорно-дигательный аппарат ден кылдалтше чер дене орланыше да футбол дене модшо-влакын федерацийыштын вице-президентше Ирина Шихкеримован ойлымыж почеш, Йошкар-Олаште южшак тугай кумылым нӧлтышӧ, чоным сымыстарыше. Калык пеш поро. Олам сайынрак ончал савырнымышт моткоч шуэш. Организатор-влак таҥасымаш деч посна нунылан каналташат поян программым ямдыленыт. «Шкем чынжымак уна гай шижат», — ешарыш тудо. Ты шотышто спартакиадым торжественно почмашке толшо Федераций Советын еҥже, Тӱнямбал паша шотышто комитет вуйлатышын алмаштышыже, Российын Параолмпийский комитетшын президентше Владимир Лукинын ойжым ушештарыме шуэш. Тудо тыгай сай вашлиймашым Сочиште эртыше пытартыш паралимпий модмаш дене гына таҥастараш лиеш, мане. А тиде — кӱкшӧ ак.
С.Носова.
Снимкылаште: Пермь кундем гыч делегаций; Татарстан делегаций;Анастасия Черепанова аваж дене пырля;
Калмыкий гыч толшо Карвеновмыт еш; И.Шихкеримова
Авторын фотожо.
